Армен болон Азербайжан улсуудийн газар нутгийн маргаан хурцдаад байгаа билээ. Нагорно-Карабах дахь мөргөлдөөний үеэр Армены байлдааны онгоцуудын нэгийг Туркийн талаас сөнөөсөн тухай мэдээлсэн байна.

Армен улсын Батлан хамгаалах яамнаас Су-25 зөвлөлтийн үеийн байлдааны онгоцыг Туркийн F-16 хөлөг Армены агаарын орон зайд сөнөөсөн хэмээн мэдэгдэв. Уг дайралтын улмаас Су-25-ын нисгэгч газар дээрээ амиа алджээ.

Энэ талаар яамны хэвлэлийн төлөөлөгч Шушан Степаньян мягмар гарагийн өглөө Туркийн F-16 байлдааны онгоц Армен улсын агаарын орон зайд 60 км нэвтэрч Су-25 онгоцыг сөнөөж, нисгэгч баатарлагаар амиа алдсан хэмээн мэдэгдсэн. Үүний дараа Азербайжан болон Турк улсууд уг дайралт, сүйрлийг батлах ямар нэг бодит баримт нотолгоо дэлгэн харуулахыг шаардаж байна.

Хилийн зөрчил мөргөлдөөн хурцдаж эхлэхэд Турк улс Азербайжан улсыг дэмжиж байгаа гэдгээ илэрхийлсэн. Гэхдээ энэ удаад Армены онгоцыг сөнөөгөөгүй хэмээн мэдэгджээ. Турк улс Азербайжаны талд гэдгээ ил тод мэдэгдсэн бол ОХУ Арменд цэргийн баазаа байрлуулсан байдаг ч Азербайжантай мөн найрсаг харилцаатай учир талуудыг харилцан буулт хийж галаа зогсоохыг уриалж байгаа.

Өнгөрсөн гурав хоногийн хугацаанд Нагорно-Карабахын уулархаг бүсэд болж буй зэвсэгт мөргөлдөөний улмаас 100 орчим хүн амиа алдсаны дотор энгийн номхон иргэд багтсан байна. Энэ газар нутгийг олон улсын зүгээс Азербайжаны нутаг дэвсгэр гэж хүлээн зөвшөөрсөн байдаг ч уугуул иргэд нь Армен гаралтай. ЗХУ-ын бүрэлдэхүүн байсан хоёр улс 1988-1994 оны хооронд газар нутгаа булаацалдан дайтаж 30,000 хүн нас барсан гашуун сургамж бий.

Азербайжан улсын нисэх хүчинд F-16 сөнөөгч онгоц байхгүй гэдгээ батлан мэдэгдсэн ч Туркийн нисэх хүчинд байдаг ажээ. Азербайжан улсын талаас цэрэг армийн гарз хохирлын талаар мэдээлээгүй ч 12 энгийн иргэн амиа алдсан тухай дамжуулсан. Сөргөлдөгч талууд харилцан нэгнээ түрүүлж гал нээж нөхцөл байдлыг хурцатгасан хэмээн буруутгаж байгаа юм.

Эх сурвалж: ВВС

---