Байгаль орчны тогтвортой менежментийг хангах, иргэдийн эрүүл аюулгүй орчинд амьдрах нөхцлийг бүрдүүлэх зорилгоор "Ой мод", "Цэнхэр алт" усаа хайрлая аяныг Экологийн цагдаагийн албанаас эхлүүлсэн.  Учир нь улсын хэмжээнд  энэ  оны эхний найман сард хүрээлэн байгаа орчны эсрэг гэмт хэрэг, зөрчлийн шинжтэй нийт 1189 гомдол, мэдээлэл  бүртгэгдсэн нь өмнөх оны мөн үеэс 1.8 дахин өссөн үзүүлэлт юм. Мөн гэмт хэргийн шинжтэй 813, зөрчлийн шинжтэй 315 гомдол, мэдээллийг буюу 95  хувийг нь хуулийн хугацаанд шийдвэрлэсэн байна. Үүнээс 56 нь хууль бусаар мод бэлтгэх, гурав нь ой хээрийн түймэр тавих,  дөрөв нь байгаль орчныг бохирдуулах гэмт хэрэг байна.

Энэ талаар ЭЦА-ны Урьдчилан сэргийлэх хамтын ажиллагааны хэлтсийн мэргэжилтэн Б.Анура "БОАЖЯ-ны харьяанд усны 21 сав газрын захиргаа орон нутагт ажиллаж байгаа ч чадавх нь сул, усны мэргэжлийн байгууллагуудын хүний нөөц, машин, тоног төхөөрөмжийг сайжруулах шаардлагатай. Хамгийн гол нь иргэд өөрсдөө гол мөрөн, усаа хайрлаж,   гамтай хэрэглэх нь чухал" гэсэн юм.

Б.ДОЛЖИНЖАВ

---