ОХУ-ын "НЛМК" буюу "Новолипецкийн төмөрлөгийн үйлдвэр" группийн гол хувьцаа эзэмшигч бөгөөд Захирлуудын зөвлөлийн дарга Владимир Лисин тус улсын тэргүүн баячуудын жагсаалтыг тэргүүлсэн болохыг "Forbes Real Time" агентлагаас мэдээлжээ. Түүний хөрөнгө 22.7 тэрбум ам.доллароор үнэлэгдэж байгаа юм. 

"НЛМК" групп нь Оросын хамгийн том ган үйлдвэрлэгч компани бөгөөд үйлдвэрлэл нь Орос, Европ, АНУ-д явагддаг. Мөн тус компани жилд 17 сая тонн гаруй шингэн ган үйлдвэрлэх хүчин чадалтай аж. Тэгвэл Владимир Лисин энэхүү хүчирхэг компанийн хувьцааны 81.4 хувийг хянадаг гэнэ.

Харин "Норникель" уул уурхай, металлургийн компанийн Ерөнхийлөгч Владимир Потанин өмнө нь энэ жагсаалтыг тэргүүлж байсан хэдий ч энэ удаад тэрээр нийт 22.3 тэрбум ам.долларын хөрөнгөөрөө хоёрдугаарт бичигджээ. Түүний дараагаар Оросын хамгийн том алт олборлогч "Полюс" компанийг эзэмшдэг Сулейман Керимовын гэр бүл бичигдсэн байна. Энэхүү гэр бүл нийт 21 тэрбум ам.долларын хөрөнгөөрөө гуравдугаарт жагсжээ.

Эх сурвалж: TASS

---