Франц улсын хамгийн их шивээстэй эрэгтэйг бага сургуульд багшлуулахгүй байх гомдол санал иржээ. Учир нь хүүхдүүдийн эцэг эхчүүд түүний харагдах байдлыг хэт өвөрмөц байгаад дургүйцсэн байна.

35 настай Силвейн Хелейн гар, хөл, бие болоод нүүр, хэлэндээ битүү шивээс хийлгэснээс гадна нүднийхээ цагааныг мэс заслын аргаар хар өнгөөр будуулжээ. Тун өвөрмөц дүр төрхтэй тэрбээр зургаа болон түүнээс дээш насны бага сургуулийн хүүхдүүдэд хичээл заадаг байна.

Сурагчид түүний харагдах байдалд тун дуртай боловч хүүхдүүдийн эцэг эхчүүдээс гомдол санал иржээ. Хелейнийг Фрийки Хүди гэж ч нэрлэдэг байна. Тэрээр өнгөрсөн жил гурван настай хүүхдүүдийн явдаг цэцэрлэгт багшилж байсан боловч хүүхдүүдийн эцэг эхчүүд түүнийг харсны дараа хүүхдүүд нь шөнө хар дарж зүүдэлж байгаа тухай гомдол мэдүүлжээ.

Удаа дараа гомдол ирсний дараа түүнийг цэцэрлэгийн насны хүүхдүүдэд хичээл орохгүй байх шийдвэрийг боловсролын салбарын албан тушаалтнууд гаргасан байна.

Өөрийнх нь хэлснээр бусдаас өөр харагдаж байгаа байдал нь хүүхдүүдэд хүн бүр адил харагдах албагүй гэдгийг зааж сургахад маш их тусалдаг гэжээ. Үүний ачаар хүүхдүүд насанд хүрснийхээ дараа арьс өнгө болон харагдах байдал, бусад зүйлээр бусдыг ялгаварлан гадуурхах үзэл нь багасна гэж Хелейн ярьжээ.

Францын хамгийн их шивээстэй эрэгтэй энэ бүх шивээсийг хийлгэхийн тулд нийт 460 орчим цагийг зарцуулсан байна. Франц улсад нүдний цагааныг харлуулах нь хууль бус гэж тооцдог тул нүдээ бүхэлд нь хар өнгөөр будахын тулд Швейцарь улсыг зорьж байжээ.

Эх сурвалж: ВВС

---