Тайландын нэгэн зочид буудлыг цахим ертөнцөд шүүмжлэн, тус бизнесийг "Орчин үеийн боолчлол" хэмээн нэрлэсэн АНУ-ын иргэн хоёр жилийн хорих ял авч магадгүй болоод байна.

Одоогоор тус улсад ажиллаж буй Уэсли Барнс гэх эрэгтэй Ко Чанг арал дээрх "Sea View" амралтын газрын нэр хүндэд хохирол учруулсан хэргээр баривчлагджээ. Барнс саяхан уг алдарт амралтын газраар зочилсон бөгөөд үүнийхээ дараа хэд хэдэн аяллын сайт дээр сөрөг сэтгэгдэл үлдээсэн аж. Тэрээр "Энд хэнийг ч байлгахыг хүсэхгүй байгаа юм шиг аашилдаг найрсаг бус ажилтнуудтай харьцах хэрэгтэй болсон" хэмээн бичсэн байна.

Харин "Sea View" амралтын газрын эзэн уг эрэгтэйг "TripAdvisor" платформ дээр зүй бус сэтгэгдэл бичсэн талаар гомдол гаргасан болохыг Ко Чангийн цагдаагийн хурандаа Танапон Таемсара мэдээлсэн юм. Тааламжгүй шүүмжүүдээс гадна Барнс уусан архиныхаа төлбөрийг төлөөгүйн улмаас зочид буудлын ажилтантай маргалдан, хүч хэрэглэсэн хэрэгт буруутгагдаж байгаа гэнэ.

Хэрэв түүний гэм буруутай нь тогтоогдвол Барнс хоёр жил хүртэлх хугацаагаар хоригдон, 200 мянган бат буюу 6,329 ам.долларын торгууль төлж болзошгүй аж.

Тайланд улс нэр төрд халдахын эсрэг хуулиараа дэлхийд зартай бөгөөд олон улсын хүний эрхийг хамгаалах байгууллагууд удаан хугацааны турш үүнийг шүүмжилсээр ирсэн билээ. 2019 онд Тайландын нэг сэтгүүлч өөрийн Твиттер хуудаснаа нэгэн тахианы фермийг шүүмжилснийхээ төлөө хоёр жилийн хорих ялаар шийтгүүлж байжээ.

Эх сурвалж: New York Post

 

---