АНУ-ын Техас мужийн нийтийн усан хангамжаас үхлийн аюултай тархи идэгч микроб илэрсэн тул албаны хүмүүс Хьюстон хотын ойролцоох зарим нутгийн оршин суугчдыг цоргоны усаа хэрэглэхгүй байхыг анхааруулжээ.

Техасын Байгаль орчны чанарын комисс баасан гарагийн орой Бразоспорт Усны газарт тус мужийн усны хангамж нь "Naegleria fowleri" хэмээх бичил биетээр бохирдсон байж болзошгүй талаар сэрэмжлүүлсэн байна. АНУ-ын Өвчнийг хянах, урьдчилан сэргийлэх төвийн мэдээлснээр "Naegleria fowleri" бол цэнгэг ус, хөрсөнд түгээмэл байдаг бичил харуурын амёб аж.

Энэхүү микроб ихэвчлэн бохирдсон усаар дамжин хүний биед хамраар нь нэвтэрдэг бөгөөд, тэндээсээ тархи руу дамжин халдварладаг байна. Тархинд хүрсэн цагтаа уг бичил биет анхдагч амебийн менингоэнцефалит хэмээх ховор, сульдаа өвчинг үүсгэдэг гэнэ.

Тус халдвар нь ихэвчлэн үхэлд хүргэдэг бөгөөд хүмүүс нуур, гол зэрэг цэнгэг ба бүлээн усанд сэлэх, шумбах үед тохиолддог байна. Бразоспорт Усны Газрын усны эх үүсвэр нь Бразос гол аж.

Нийт хамаарах бүсэд ойролцоогоор 120 мянган хүн амьдардаг. Түүнчлэн Фрийпорт дахь 4,200 ажилтантай "Dow Chemical" компани болон 2,345 хоригдол, 655 ажилтантай мужийн шоронгийн ангиуд өртсөн байна.

Бразоспортын удирдлагууд байгууллагын усны системийг сайтар цэвэрлэн, дараагаар нь усны дээжид туршилт хийн, уг системийг ашиглахад аюулгүй болохыг батлах хүртэл одоогийн зөвлөмжийг хэвээр үлдээх гэнэ. Уг мэдэгдэлд мөн цоргоны ус аюулгүй болох хүртэл хэр удаан хугацаа шаардагдах нь тодорхойгүй байна хэмээн мэдэгджээ.

Эх сурвалж: The Guardian

---