Нийслэл хотод золбин нохой ихсээд байгаа. Үүнтэй холбоотой устгал явуулдаг ч золбин ноход уул, ой мод руу орж сүрэглэн зэрлэгшдэг байна. Тийнхүү зэрлэгшсэн ноход айлын мал барих, ан амьтдын нялх төлийг барих тохиолдол ихсээд байгаа юм.

Нэг жилийн өмнө Сүхбаатар дүүргийн нутаг дэвсгэрт буюу Сэлбэ зусланд зэрлэг ноход янзага барьсан тухай мэдээлэл гарч байсан. Хотын орчимд зэрлэг ноход элбэг болж тэр хэрээрээ малчид болон ан амьтанд хөнөөл учруулах болоод байгаа юм.  

Айл өрхүүд нүүж явахдаа тэжээж байсан нохойгоо орхих, гэртээ тэжээж байсан нохойныхоо гөлгийг төөрүүлэх нэрийдлээр зуслангын газар, ууланд аваачиж хаях тохиолдлууд их байгаа бөгөөд үүнийг дагаж зэрлэг нохдын сүрэг нэмэгддэг аж. Мөн хотод нохойн устгал эхлэхэд зугтаж дайжсан ноход уул хаданд гарч сүрэглэн амьдардаг байна.

Нохойг хараад мал үргэж зугтдаггүй. Мөн нохой өөрөө хүнээс тэр бүр айгаад байдаггүй. Тийм учраас гар мухар малчид иргэд нохойн дайралтад өртсөөр байгаа юм. Хот болон хотын хойд чиглэлийн зуслангын бүсэд нохойн устгал явуулдаг. Харин Богд хан уулын дархан цаазат бүсэд буун дуу гаргах хориотой. Тийм ч учраас тусгай зөвшөөрөл албаны хүмүүсийн хамтын ажиллагааны дүнд зэрлэг ноходын тоог багасгахаар ажиллаж байна.

 

---