Манай улсын хувьд гадаадаас ирж байгаа бүх иргэдийг коронавирусийн шинжилгээнд хамруулж байгаа. Өнөөдрийн байдлаар зөөвөрлөгдөн батлагдсан тохиолдол 313 болж, 303 иргэн бүрэн эмчлэгдэн эмнэлгээс гарсан.

Манай улсын хувьд дотоодод коронавирусийн халдвар бүртгэгдээгүй тул бусад улс орнууд шиг иргэдээ бүрэн шинжилгээнд хамруулахгүй байгаа ажээ. Гэхдээ иргэн та хүсвэл коронавирусийн халдварын шинжилгээг сайн дураараа өгөх боломжтой гэдгийг ХӨСҮТ-ийн ерөнхий захирал Д.Нямхүү дурдаж, энэ сарын 21-22-ны өдрүүдэд сайн дураар шинжилгээ өгсөн 99 хүний сорьцоос коронавирусийн халдвар илрээгүй хэмээсэн юм.

Иргэдийн хувьд гадаад улс руу суралцахаар, албан ажлаар явж байгаа иргэд сайн дураараа шинжилгээ өгч байна. ХӨСҮТ-ийн амбулаторит 08:30-12:00 цагийн хооронд иргэд 150 мянган төгрөгөөр коронавирусийн шинжилгээ өгөх бүрэн боломжтой аж.

---