Нэгдсэн Үндэстний Байгууллагын Ерөнхий Ассамблейн 75 дугаар чуулганы үеэр ОХУ-ын Ерөнхийлөгч Владимир Путин тус байгууллагын ажилчдад "Спутник-V" коронавирусийн эсрэг вакциныг үнэгүй түгээнэ хэмээн мэдэгджээ.

Тэрээр "Бидний хэн нь ч энэ аюултай вирустэй нүүр тулах боломжтой. Вирус НҮБ-ын төв байр болон бүс нутгийн байгууллагуудын ажилчдыг тойрч өнгөрөөгүй" хэмээн мягмар гарагт Москвагаас илгээсэн бичлэгтээ хэлсэн байна. Цар тахлын улмаас энэ жилийн Ерөнхий Ассамблей түүхэндээ анх удаа "гэрээсээ" яриагаа бичин илгээх журмаар зохион байгуулагдаж байгаа юм.

Өнгөрсөн сард "Спутник-V" вакциныг дэлхий нийтэд зарлан, өөрийн төрсөн охин нь туршилтын вакциныг тариулсан гэж мэдэгдэж байсан Путин "ОХУ НҮБ-ын ажилчдад шаардлагатай, мэргэжлийн тусламжийг үзүүлэхэд бэлэн байна. Ялангуяа бид вакцинжуулалтад сайн дураараа оролцох хүсэлтэй НҮБ болон түүний салбар байгууллагуудын ажилчдад вакцинаа үнэгүй нийлүүлэхийг санал болгож байна" гэжээ.

Мөн тэрээр энэхүү саналыг олон нийтийн эрэлт хэрэгцээний хариу гэж тайлбарлан "НҮБ-ын зарим хамт олон биднээс энэ талаар асуусан. Бид тэдний хүсэлтэд хайхрамжгүй хандахгүй" гэсэн байна.

НҮБ-ын хэвлэлийн төлөөлөгч Стефан Дюжаррик үүний хариуд "Ерөнхийлөгч Путины тавьсан өгөөмөр саналд бид талархаж байна. Манай эмнэлгийн үйлчилгээ энэ талаар судалж үзэх болно" гэжээ.

Тэгвэл ДЭМБ-ын Европ дахь бүсийн захирал Ханс Клуге өнгөрөгч даваа гарагт Москва хотод айлчлан, ОХУ-ын Эрүүл мэндийн сайд Михаил Мурашкотой уулзсаныхаа дараа "Спутник-V" вакциныг сайшаасан болохыг Оросын хэвлэл мэдээллийн хэрэгслүүд мэдээлсэн юм. Тэрээр ДЭМБ Оросын коронавирусийн эсрэг вакцин бүтээх хүчин чармайлтыг үнэлж байгааг тэмдэглэн, "Спутник-V" вакциныг аюулгүй бөгөөд үр дүнтэй гэсэн байна.

Эх сурвалж: Associated Press

---