Афганистаны иргэн Таж Биби өмнөх гурван нөхрөө Талибан бүлэглэлийн эсрэг дайнд алджээ. Одоо тэрээр дөрөв дэх нөхрөө энэ дайнд алдах вий гэхээс эмээж байна. Түүний талийгаач гурван нөхөр болон одоогийн нөхөр нь бүгд ах дүү нар аж.

Катар дахь энхийн хэлэлцээр олон жил үргэлжилсэн Афганистаны дайныг зогсоох найдварыг төрүүлсэн хэдий ч Афганистаны Засгийн газрын цэргүүд болон Талибаны босогчдын хоорондох мөргөлдөөн намжаагүй байгаа юм. Өнгөрсөн долоо хоногт тус улс орон даяар Афганы аюулгүй байдлын хүчний дор хаяж 60 гишүүн амь үрэгдсэн байна.

Таж Бибигийн нөхөр Аминулла нь одоо фронтын шугам дээр гурван сар алба хаахаар явах гэж байгаа бөгөөд Биби улсын эрх баригчдаас түүнийг дөрөв дэх удаагаа бэлэвсэн болгохгүй байхыг гуйж байгаа юм. Афганистаны зүүн хэсэгт орших уулархаг Кунар мужийн Садекабад нутагт амьдардаг 33 настай Биби "Би таван хүүхдээ дахин өнчрөхийг харж чадахгүй" гэжээ. Тэрээр одоо жирэмсэн байгаа аж.

Биби анх 18 настайдаа Аминуллагийн хамгийн том ахтай гэрлэж байжээ. Түүний амьдрал сайхан байсан ч удалгүй цэрэг нөхөр нь Талибаны цэргүүдтэй тулалдаж байгаад алагдсан байна. Үүнээс хэдэн сарын дараа тэрээр талийгаач нөхрийнхөө бага дүүтэй гэрлэсэн аж. 

Бэлэвсэн эмэгтэй гэр бүлээс гадуур гэрлэх ёсгүй гэсэн итгэл үнэмшлээс болж бэлэвсэн эмэгтэйчүүд хүргэн ах нартайгаа гэрлэх нь Паштун үндэстний дунд түгээмэл байдаг байна. Гэвч Биби шинэ амьдралтайгаа эвлэрч амжихаас өмнө шалган нэвтрүүлэх цэгийг талибуудын дайралтаас хамгаалж байсан хоёр дахь нөхөр алагдсан гэнэ. 

90 хоногийг уй гашуу дунд өнгөрүүлснийхээ дараа тэрээр хадам эцгийнхээ хүслийг хүлээн зөвшөөрөн, гурав дахь хүү нь болох цагдаагийн албан хаагчтай гэрлэжээ. Гэвч шинэ нөхөр нь 2017 онд мөн л Талибаны мөргөлдөөний үеэр амиа алдсан байна. Тэр жилдээ Биби талийгаач нөхрүүдийнхээ дүү Аминуллатай гэрлэжээ.

"Би заримдаа талибуудыг, заримдаа Афганистаны Засгийн газрыг, заримдаа гадаадын хүчнийг буруутгадаг хэдий ч энэ бүх зовлонд ихэнхдээ өөрийгөө буруутгадаг" гэж Таж Биби "Reuters" агентлагт хэлжээ.

Биби өдрийн ихэнх цагаа хүүхдүүддээ хувцас оён өнгөрүүлдэг бөгөөд тэрээр Аминуллагийн сарын орлого болох 300 ам.доллар болон нас барсан нөхрүүдийнхээ тэтгэмжээр таван хүүхэд ба гэр бүлийн бусад 15 гишүүнээ тэжээдэг аж. Тэрээр энэ талаар "Миний амьдрал нөхөр минь амьд үлдэх эсэхээс хамаарна" хэмээсэн байна.

Ярианыхаа төгсгөлд Биби хүмүүс нэг удаа үхдэг ч гурван нөхрөө алдсаны дараа тэрээр аль хэдийн гурван удаа үхсэн юм шиг санагдсан гэжээ.

Эх сурвалж: Reuters

---