Тайландын нийслэл Бангкок хотын ойролцоо орших алдарт Као Яй үндэсний цэцэрлэгт хүрээлэнгийн удирдлагууд хог хаясан иргэдийн хогийг тэдэн рүү буцааж илгээхээр болсныг тус улсын Байгаль орчны сайд мэдэгдэв. Түүнчлэн зөрчил гаргасан хүмүүсийг цагдаагийн байгууллагад бүртгэх гэнэ.

Энэ ажлын хүрээнд уг цэцэрлэгт хүрээлэнд зочилж буй хүмүүс оршин суудаг хаягаа бүртгүүлэн нэвтрэх бөгөөд ингэснээр иргэд хог хаягдал үлдээсэн тохиолдолд байгаль хамгаалагчид тэднийг хайж олоход хялбар болох юм.

Байгаль орчны сайд Варавут Силпа-арча өөрийн фэйсбүүк хуудаснаа шуудангаар илгээхэд бэлэн болсон хогоор дүүрэн цаасан хайрцгуудын зургийг байрлуулаад "Таны хог хаягдлыг бид танд буцааж илгээх болно" хэмээн анхааруулжээ. Эдгээр цаасан хайрцагт хуванцар сав, лааз, чипсний уут зэрэг хог хаягдлын хамт "Та эдгээр зүйлийг Као Яй үндэсний цэцэрлэгт хүрээлэнд мартчихсан байна" гэсэн эелдэг зурвас хавсаргасан байна.

Цэцэрлэгт хүрээлэнгийн удирдлагуудын хэлснээр иргэдийн хаяад явсан хогийг амьтад идэхийг оролдож болзошгүй бөгөөд энэ нь тэдэнд онцгой аюултай аж. Хоёр мянга гаруй квадрат км талбайг хамардаг Као Яй үндэсний цэцэрлэгт хүрээлэн нь тус улсын хамгийн эртний үндэсний цэцэрлэгт хүрээлэн бөгөөд хүрхрээ, ан амьтан, үзэсгэлэнт газруудаараа алдартай юм.

Тайландын хуулиар үндэсний цэцэрлэгт хүрээлэнд хог хаях нь гэмт хэрэг бөгөөд шийтгэл нь таван жил хүртэлх хугацаагаар хорих ял болон өндөр торгууль байдаг аж.

Эх сурвалж: BBC

---