Зургаан удаагийн Оскарын шагналт, алдарт "Форрест Гамп" киноны номын зохиолч Уинстон Грум 77 насандаа таалал төгсжээ.

Түүний төрөлх Алабама мужийн Ферхоп хотын захирагч Карин Вилсон энэхүү мэдээг хэвлэлийнхэнтэй хуваалцсан байна. Тэрээр "Надад одоогоор дэлгэрэнгүй мэдээлэл байхгүй ч Уинстон Грум лхагва гарагийн шөнө нас барсан. Бид энэ мэдээг сонсоод туйлын их харамсаж байна. Тэр үнэхээр эндхийн шүтээн байсан" гэсэн юм.

Грум 1965 онд Алабамагийн Их Сургуулийг төгсөөд АНУ-ын армид дөрвөн жил алба хаажээ. Төрөлх муждаа эргэж ирснийхээ дараа тэрээр "Washington Star" сонины сурвалжлагч байсан бөгөөд удалгүй өөрийн роман зохиол бичихдээ анхаарах болсон байна.

"Форрест Гамп" бол түүний хамгийн их борлуулалттай ном. Энэхүү роман 1994 онд Том Хэнксийн тоглосон кино болон хувирч, зургаан ангилалд Оскарын шагнал хүртсэн. 1995 онд Грум "Gump and Co." нэртэй хоёр дахь номыг хэвлүүлж байжээ.

Форрест Гампын түүхийг бичихээс гадна Уинстон Грум Америкийн Иргэний дайн болон бусад олон төрлийн сэдвийн баримтат ном бичиж байсан. Вьетнамын дайны үеэрх нэгэн тэнгисийн явган цэргийн түүхийг өгүүлэх түүний "Conversations with the Enemy" ном нь 1984 онд Пулитцерийн шагналд нэр дэвшиж байсан билээ.

Эх сурвалж: CNN

---