"Хоёр настай эмэгтэй хүүхэд айлд өргүүлнэ" гэсэн зар фейсбүүкийн нэг группт буюу цахим орчинд өчигдөр тавигдсан. Тус мэдээллийн мөрөөр үүссэн асуудлыг Цагдаагийн байгууллагаас хэрхэн шийдэж байгааг бид тодрууллаа.

Тус үйлдлийг цагдаагийн байгууллагаас шалгах явцад залуу гэр бүл, амьжиргааны түвшин доогуур амьдралтай байсны улмаас ийм үйлдэл хийхэд хүргэсэн нь урьдчилсан байдлаар тогтоогджээ. Хэрэв хүн худалдаалах гэмт хэргийн шинжтэй байх юм бол эрүүгийн хуулийн 13.1-т зааснаар хэрэг үүсгэн шалгах юм.

Эрүүгийн хуулийн 16 дугаар бүлгийн 11 дүгээр хэсэгт зааснаар эцэг, эх, асран хамгаалагч хуулиар хүлээсэн асран хамгаалах үүргээ биелүүлээгүйн улмаас хүүхдийн эрүүл мэндэд хүндэвтэр хохирол учирсан бол гурван жил, амь нас нь хохирсон бол найман жил хүртэл хорих ялаар шийтгэхээр заасан байдаг.

---