Шинэ коронавирусийг БНХАУ-ын лабораторид хүний гараар бүтсэн хэмээн мэдэгдээд байсан Хятадын вирус судлаач энэ долоо хоногт баримт нотолгоо бүхий судалгааны тайлангаа нийтэлжээ.

Хонконгийн Нийгмийн эрүүл мэндийн сургуулийн судлаач асан, доктор Ли-Мэн Ян "Zenote" нээлттэй платформ дээр байрлуулсан нийтлэлдээ "SARS-CoV-2"-ийг лабораторийн орчинд зургаан сарын хугацаанд хэрхэн яаж "хялбархан" бүтээж болохыг батлах баримт бичгийг оруулсан гэсэн юм.

Өөр хоёр хүнтэй хамтран бичсэн энэхүү тайлан нь "SARS-CoV-2 геномын байгалийн хувьслаас илүү нарийн лабораторийн өөрчлөлтийг харуулах ер бусын шинж чанар болон түүний синтетик маршрутын дүрслэл” гэсэн гарчигтай аж. Тодруулбал, тэдний цуглуулсан баримтууд нь "SARS-CoV-2 нь байгалийн гаралтай, зоонозын вирусийн онцлогтой үл нийцэх биологийн шинж чанартай" болохыг харуулах гэнэ. 

Үүнээс өмнө Ли-Мэн Ян Британийн "Loose Women" нэвтрүүлэгт оролцохоор коронавирусийг "Лабораториос гаралтай - Ухань дахь лаборатори. Мөн энэ лабораторийг Хятадын засгийн газар удирддаг" гэсэн юм. Түүнчлэн тэрээр уг вирусийг Ухань хотын нойтон захаас гаралтай гэдэг нь үнэнийг халхлах гэсэн худал мэдээлэл болохыг онцолсон бөгөөд энэ бүх мэдээллийг Хятадын Халдварт өвчин судлал, урьдчилан сэргийлэх төв төдийгүй орон нутгийн эмч нараас авсан хэмээжээ.

Ли-Мэн Яны хэлснээр тэрээр өнгөрсөн жил "COVID-19"-ийн талаарх хамгийн анхны судалгааг хийж байсан бөгөөд түүний олж мэдсэн зүйлсийг мэдсэнийхээ дараа Бээжингээс түүний судалгааг нуун дарагдуулсан байна. Ингээд тэрээр цар тахлын талаарх үнэнийг илчлэхээр өнгөрөгч дөрөвдүгээр сард Хонконгоос Америк руу зугтан, өөрийн аюулгүй байдлын төлөө нуугдаж байгаа аж. Мөн түүнийг Хятадаас зугтахаас өмнө тус улсын Засгийн газрын мэдээллийн сангаас түүний бүх мэдээлэл устсан байсан гэнэ.

Эх сурвалж: New York Post

---