Монгол Улсын Сайд нарын Зөвлөл (Одоогийн Засгийн газар)-ийн референтээр 10 гаруй жил ажилласан төр, нийгмийн зүтгэлтэн Д.Гонгор гуайтай амьдрал, намтрынх нь талаар хөөрөлдөж байх үед маш сонирхолтой нэгэн явдлыг бидэнд ярьсан юм.

Төр нийгмийн зүтгэлтэн Д.Гонгор:

СнЗ-ийн зөвлөлийн хуралдааны үеэр сайд нар асуудлыг бүх талаас нь хэлэлцэн мэтгэлцэж, санал дүгнэлтээ хэлдэг байсан. Тэрхүү мэтгэлцээн хуралдааны үеэр Ж.Самбуу дарга чимээгүй л тамхи татаад суудаг байв. Тэгээд хэлэлцүүлэг дуусны дараа Ю.Цэдэнбал дарга, түүний орыг залгасан Ж.Батмөнх дарга нар, “За Ж.Самбуу даргаа танд хэлэх үг байна уу” гэхэд тэрбээр босож явуут дундаа саналаа хэлдэг. Тэгж хэлсэн үгийг нь хууль мэт дагадаг байсан.

Тэр жил Сайд нарын Зөвлөлийн хуралдааны үеэр газар тариалангаас авах ургацыг нэмэгдүүлэх асуудлыг хэлэлцэх үед Улсын төлөвлөгөөний комиссын орлогч дарга н.Дашдондог “Газар тариалангийн талбайг өргөтгөж болохгүй. Салхинд хийсчихнэ. Түүний оронд нэгж талбайгаас авах ургацын хэмжээгээ нэмэгдүүлэх ёстой” гээд нэлээн ширүүхэн хэлсэн. Түүнийх нь дараа Ж.Самбуу дарга “Энэ хүүхэд их зөв зүйл ярьж байна. Энэ хүүд амьдрал үзүүлэх ёстой юм байна” хэмээн хэлсний маргааш нь л орлогч дарга н.Дашдондогийг “Жаргалант”-ын сангийн аж ахуй руу агрономич болгоод илгээчихсэн юм шүү дээ.

 

 

---