Хэлмэгдэгсдийн дурсгалыг хүндэтгэх өдөрт зориулан Төрийн соёрхолт, түүхийн ухааны доктор Дэмбэрэлийн Өлзийбаатар 108 ширхэг “Лхүмбийн хэрэг” номоо үнэгүй гардууллаа.
Тэрбээр “Энэ өдрийг бид нар жил болгон тэмдэглэн өнгөрүүлдэг. Төрийн удирдлагууд хэлмэгдэгсдийн ар гэр, нийт ард иргэд ирж хүндэтгэл үзүүлж дурсдаг өдөр. Энэ өдрийг тэмдэглэдгийн учир нь дахин ийм зүйл битгий давтагдаасай гэсэн үйл ажиллагаа юм. Төр гэмгүй хэлмэгдсэн ард түмнээсээ бид нарын буруу хэмээн уучлал гуйдаг.
Энэ өдрийг мартаж болохгүйн учир нь 20 зууны эхэн үед Монгол Улсад өрнөсөн дотоод, гадаад улс төрийн бодлоготой холбоотой. 20 зуун тэр чигээрээ Монголчуудын хувьд тусгаар тогтнохын төлөө тэмцсэн зуун байгаа.

1933 онд Монгол оронд болсон МАХН-ын Төв хорооны нарийн бичгийн дарга Ж.Лхүмбээр толгойлуулсан зохиомол хэргийг Хэнтий аймагт хэрхэн зохион байгуулсан талаар өгүүлсэн Лхүмбийн хэрэг 108 ширхэг номоо өнөөдөр залуучуудад гардуулан өглөө” гэсэн юм.

---