Мэргэжлийн боксын IBO холбооны дэлхийн аварга, МУГТ Н.Төгсцогт есдүгээр сарын 19-ний өдөр Мексикийн Эдуардо Рамирезтэй тулалдах хуваарьтай байсан ч Э.Рамирезийн ковид-19 шинжилгээний хариу эерэг гарчээ.
Ийнхүү коронавирусын халдвар авсан нь тодорхой болсны улмаас Э.Рамирез тулалдах боломжгүй болсныг WBC холбооноос зарлалаа. Хэдийгээр өрсөлдөгч нь тулалдах боломжгүй болсон ч тулаан товлосон хугацаандаа явагдах ба гагцхүү Н.Төгсцогттой тулалдах өрсөлдөгч нь солигдох юм. Энэ удаад түүнтэй өрсөлдөх тулаанч бол Барбадосын Кобиа Брийди байх болно.
Кобиа Брийдигийн хувьд 2014 оноос мэргэжлийн рингэнд 15 тулаанд орохдоо нэг ч ялагдаагүй яваа шилдэг тулаанч юм. Тэрээр ээлжит тулаанаа энэ оны гуравдугаар сард Эугене Лагостой тулалдах хуваарьтай байсан хэдий ч коронавирусын улмаас тулаан нь цуцлагдаад байсан юм.
Хэн ялсан нь дэлхийн аваргын төлөө тулалдах эрхээ авах тун чухал тулаан биднийг хүлээж байна. Өөрөөр хэлбэл хэн ялсан нь тус жинд аваргын бүсийг эзэмшиж буй Гэри Рассельтай дэлхийн аварга цол, бүсний төлөө тулалдах эрхтэй болох юм.
