ОХУ-ын сөрөг хүчний удирдагч Алексей Навальныйг өнгөрсөн сард хордуулсан хор ЗХУ-ын үеэс улбаатай Новичок байсан гэдгийг ХБНГУ-ын канцлер Ангела Меркель мэдэгдсэн билээ. Германы цэргийн лабораторид хийсэн шинжилгээний хариуг Засгийн газар төдийгүй НАТО, Европын холбоо хүлээн зөвшөөрч байгаа тул үүнд хариулт өгөхийг Кремлиэс шаардаад байгаа юм.

Тэгвэл НАТО-ын удирдлагууд Оросын Засгийн газарт хандан Новичок хөтөлбөрөө ил тод болгож олон улсын хяналтан дор үйл ажиллагаа явуулахыг уриаллаа. НАТО-ын Ерөнхий нарийн бичгийн дарга Женс Столтенберг гишүүн орнуудын Засгийн газрууд ч мөн санал нэгтэйгээр Навальныйд халдсан хэргийг шүүмжлэн буруутгаж байгаа гэжээ. Тэрээр хэрэв ОХУ Навальныйгийн халдлагад буруугүй юм бол хэргийн мөрдөн шалгах ажилд олон улсын байгууллагатай хамтран ажиллах ёстой хэмээн мэдэгдсэн байна.

Эх сурвалж: ВВС

---