Майсак далайн хар шуурга Зүүн Хятадын тэнгисийн орчимд шуурч Японы далайн эрэгт хүрчээ. Хар салхины улмаас ачаа тээврийн усан онгоц живж осолджээ. Японы далайн эргийн хамгаалалтын алба живсэн ачаа тээврийн хөлөг онгоцноос нэг хүнийг аварсан байна.

Тус хөлөг багийн 40 гаруй бүрэлдэхүүний хамт далайн шуурганд живсэн гэж үзжээ. Хайгуулын ажлаа үргэлжлүүлж байгаа ч амьд хүн дахин олоогүй байна. Түүнчлэн 6,000 бод мал шуурганы үеэр далайн усанд живсэн гэж мэдээлжээ.

Живсэн ачаа тээврийн хөлөг дээр Филиппиний 39 далайчин, Шинэ Зеландын хоёр, Австралийн хоёр далайчин байжээ. Японы эргийн хамгаалалтын албаныхны аварсан далайчин Филиппиний иргэн байсан гэж мэдээллээ. 45 настай Эдуардо Сарено нь хөлгийн ахлах офицер байсан бөгөөд багийнхныг аврах хантааз өмсөхийг даалгаж ус руу үсэрсэн хэмээн ярьсан байна. Тэрээр аврагдахаасаа өмнө багийн бусад гишүүдийг далайд олж хараагүй гэжээ.

Далайн ёроолд живсэн гэж үзэж буй Gulf Livestock 1 ачааны усан онгоц наймдугаар сарын 14-ны өдөр Шинэ Зеландын эргээс хөдөлж Хятадын эргийг чиглэн аялалд гарсан байна. 17 хоногийн хугацаатай аялахаар төлөвлөсөн байсан ч лхагва гарагийн шөнө Японы баруун өмнөд Амами Ошима арлын ойролцоогоос тусламжийн дуудлага өгчээ.

Австрали болон Шинэ Зеландын Засгийн газар хөлөг дээр байсан далайчдын ар гэрт консулын тусламж үзүүлэхээр ажиллаж байгаа гэж мэдэгдэв. Gulf Livestock 1 хөлөг нь 2002 онд баригдсан, 139 метр урт, Панамын далбайтай ажээ.

Аадар бороо, хүчтэй салхин шуурга дагуулсан Майсак хар салхи өнөөдөр Өмнөд Солонгосын Бусан боомтын хотын орчимд шуурч нэг хүн нас барж, 2,200 гаруй хүнийг түр орогнох байр луу шилжүүлжээ. Мөн Бусан орчмын 120,000 айл гэрэл цахилгааны эх үүсвэрээс тасарчээ.

Эх сурвалж: ВВС

---