НИТХ-ын дарга Р.Дагваас нийслэлчүүдийг бухимдуулаад байгаа зам засварын талаар тодруулга авлаа. 

-Хотын захиргаанаас бодлогын түвшинд хэрэгжүүлж байгаа нэг томоохон арга хэмжээ бол сургуулийн автобусыг яаралтай явуулах шийдэлд хүрч байгаа. Уг ажлыг есдүгээр сарын 15-наас эхлүүлэхээр бэлтгэл ажилдаа орсон.

Зам засварын ажилтай холбогдуулан Улаанбаатар хотын хэмжээнд 10 гаруй байршилд их бага хэмжээгээр зам хаасан. Өвөлжилтийн бэлтгэл ажилтай холбоотойгоор дулааны шугам сүлжээний ажлууд хийгдэж байгаа. Эдгээр ажлуудыг есдүгээр сарын 20-н гэхэд дуусгахаар ажиллаж байна.

Зам засварын ажлыг эхлэхээс өмнө нь хуулийн дагуу тендер зарлагддаг. Тендер нь дахин дахин зарлагдах, төсөв хөрөнгө нь бага, он дамнуулан санхүүжүүлэхээр хөрөнгө оруулалт тавигдсан гээд маш олон хүчин зүйлээс шалтгаалж тендер хойшлогдох тохиолдол байдаг. Үүнд ямар нэгэн төрийн албан хаагчийг буруутгахаас илүү цаашид хариуцлагаа өндөржүүлэх саналыг НИТХ-аас НЗД-т хүргүүлж байгаа.

Улаанбаатар хотын агаарын бохирдлыг бууруулах ажлын хүрээнд нүүрсээр ажилладаг нам даралтын зуух буюу уурын зуухнуудад технологийн шинэчлэл хийх замаар газ, цахилгаанаар ажилладаг болгох ажлыг хувийн хэвшилтэй хамтран хэрэгжүүлэхээр ажиллаж байна.

---