Коронавирусийн халдвар дэлхий даяар салбар бүрт өөрчлөлт авчирж байгаагийн дунд тасалгааны цэцэрлэгжүүлэлт ч багтжээ. Шинэ Зеландад дөрвөн навчтай тасалгааны ургамал 8,000 шинэ зеланд доллар буюу 15 сая төгрөгийн үнээр зарагдсаныг The Guardian мэдээлжээ.

Судлаачдын үзэж байгаагаар тасалгааны ургамал, цэцэрлэгжүүлэлтийг millinial буюу шинэ мянганы залуу үеийнхэн илүүтэй сонирхдог болсон гэжээ. Учир нь тэдний ихэнх нь санхүүгийн болон орон сууцны хязгаарлагдмал байдлаас шалтгаалж тэжээвэр амьтан тэжээх, нялх хүүхэд бойжуулах боломж хомс байдаг тул тасалгааны ургамал тарьж ургуулах сонирхол давамгайлсан байдаг аж.

Коронавирус тархсан энэ үед хөл хорионд орсон иргэдийн дунд цэцэрлэгжүүлэлт, тасалгааны ургамал трэнд болж Инстаграм зэрэг цахим хуудсуудад ч эрэлттэй болжээ. Долоо хоног бүр хэдэн арван мянгаараа зарагдаж байгаа гэнэ.

Өнгөрсөн наймдугаар сард Trade Me хуудсаар дэлхийн хамгийн үнэтэй тасалгааны ургамал зарагдсан нь дөрвөн навчтай алаг минимум нэртэй ургамал юм. Үүнээс өмнө 1,650 шинэ зеланд доллараар зарагдсан нь хамгийн үнэтэйд тооцогдож байжээ.

Оклэндийн оршин суугчийн зарсан дөрвөн навчтай алаг минимум тун ховор ажээ. Trade Me цахим хуудасны төлөөлөгчдийн хэлснээр долоо хоногийн хугацаанд ийм төрлийн навчит ургамлыг хайсан 1,600 илэрц бүртгэгдсэн байна. Харин Facebook цахим хуудсанд Шинэ Зеландын тасалгааны ургамал групт 30,000 гишүүн бүртгэлтэй байна. 

Эх сурвалж: The Guardian

---