Баянгол дүүргийн нутаг дэвсгэрт буюу Вокзалын хойд талын зам дээр “Вокзал-Ботаник” чиглэлийн троллейбус өнөөдөр 15:30 цагийн үед шатжээ. Нийслэлийн Онцгой байдлын газрын алба хаагчид шуурхай ажиллаж, галыг унтраасан байна. Галын улмаас хүн гэмтэж осолдоогүй гэдгийг мэдэгдлээ.

Ослын талаар ОБЕГ-ын хэвлэл, мэдээлэл, олон нийттэй харилцах асуудал хариуцсан мэргэжилтэн ахмад Х.Бурмаагаас тодруулахад “Галын улмаас бэртэж гэмтсэн хүн байхгүй, галыг бүрэн унтраасан. Ослын шалтгаан нөхцөлийг тогтоохоор холбогдох албаныхан үзлэг шалгалт хийж байгаа ба  хуулийн хугацаа нь хамгийн багадаа 14 хоног байдаг” гэлээ. 

Жолоочийн хэлж буйгаар гэрлийн утаснаас масс гараад шатсан. Хүнгүй явж байсан ба галын хороор унтраах гээд дийлдэхгүй гал унтраах ангийг дуудсан. Галынхан дуудлага өгөөд удаагүй 3-4 минутад ирсэн гэнэ. Тухайн троллейбусны хувьд 2009 онд БНХАУ-д үйлдвэрлэсэн бөгөөд 2021 онд актлагдах байсан ажээ. 

Нийт жолоочдыг тээврийн хэрэгслийн бүрэн бүтэн байдлыг хангаж, галын хор, эмийн сан зэргийг бэлэн байдалд авч явахыг холбогдох албаны зүгээс анхаарууллаа.

---