Өвөр Монголын Өөртөө Засах Оронд эх хэлээрээ хичээл орохыг хориглосон тогтоол гарч, энэ сараас хэрэгжиж эхлэх талаар олон нийтийн мэдээллийн хэрэгслүүдээр таран, олон хүнийг цочирдуулаад байгаа билээ.

БНХАУ-ын эрх баригч Коммунист намаас Өвөр Монгол дахь сургуулиудын бүх хөтөлбөрийг хятад хэл дээр бүрэн шилжүүлэх шинэ бодлогыг гаргаад байгаа. Угаасаа тус автономит мужид монгол хэлээр хичээл заадаг цөөхөн хэдэн сургууль үлдээд байхад ийм шийдвэр гаргасан нь орон нутгийн иргэдийн дунд асар их дургүйцлийг хүргэж байна.

Өнгөрсөн долоо хоногоос эхлэн тодорхой бүс нутгуудаар өргөн хүрээний эсэргүүцлийн хөдөлгөөн өрнөж байгаа юм. Бүс нутгийн эцэг, эхчүүд хэдэн долоо хоногийн турш өргөдөл бичин, эсэргүүцлийнхээ хүрээнд хүүхдүүдээ гэртээ байлган, хоорондоо зохион байгуулалттай ажиллаж байгаа. Монголчууд олноор амьдардаг Тунляо хотын ойролцоох нэг суурины сургуулийн дотуур байрны гадаа эцэг, эхчүүд цугларан, хүүхдүүдээ тус сургуулиас гаргаж авахыг шаардсан байна. Тэднийг орон нутгийн цагдаа нартай мөргөлдөх үеэр нэг сурагч дөрөвдүгээр давхрын цонхоор үсрэн, амиа алдсан харамсалтай хэрэг гарчээ.

Харин өнгөрөгч амралтын өдрүүдээр дүрэмт хувцас өмссөн сургуулийн сурагчид эгнээ эгнээгээр зогсон, “Бидний эх хэл бол монгол хэл! Бид үхэн үхтлээ монгол хүн!" хэмээн дуу нэгдэж орилон, эсэргүүцлээ илэрхийлсэн байна. Үүнтэй адил эсэргүүцлийн хөдөлгөөн болон сургуулийн гадаа уриа лоозон барин, дуу дуулан, тайван жагсаал хийж буй эцэг, эх, сурагчдын зураг, бичлэг олон нийтийн сүлжээгээр ихээхэн тараад байсан билээ. Гэвч энэ даваа гарагт Хятадын олон нийтийн мэдээллийн сайтуудаас их хэмжээний ийм төрлийн бичлэг алга болсон бөгөөд тэднийг цахим цензурээр устгасан байх гэж иргэд үзэж байна.

Тэгвэл нийгэмд өөрчлөлтийг авчрах зорилготой "change.org" цахим хуудаст "SAVE EDUCATION IN INNER MONGOLIA" буюу "ӨВӨРӨӨ ХАМГААЛЪЯ" нэртэй цахим өргөдөлд таны оролцоо том тус дэм хүргэх болно. "Өвөрөө хаацайлахгүй бол, дараа нь өвөрт тань орж мэдэхээр байна шүү. Цаашилбал хүний эрх, соёлын өв, улс төрийн ёс жаяг ноцтойгоор зөрчигдөж байна" хэмээн онцгойлсон уг цахим өргөдөл нь НҮБ болон дэлхийн хүний эрхийн байгууллагуудад хандаж байгаа аж.

Зорилтот 15 мянган цахим гарын үсгээ цуглуулахад гурван мянга хүрэхгүй хүний дэмжлэг хэрэгтэй байгаа учир та өөрийн хэдхэн секундийг зарцуулан, энэ том тэмцлийн нэг хэсэг болоорой. Та энэ холбоосоор ороод, овог, нэр, и-мэйл хаягаа оруулаад л цахим гарын үсгээ баталгаажуулах боломжтой. 

Эх сурвалж: The Washington Post, The New York Times

---