БНХАУ-ын хойд хэсэгт орших нэгэн тосгоны оршин суугч 80 насныхаа ойг тэмдэглэж байх үеэр түүний баяр болж байсан хоёр давхар хоолны газар гэнэт нуран, 29 хүн амиа алдсан байна.

Тус улсын Онцгой байдлын яамны мэдээлснээр өнгөрөгч бямба гарагт болсон уг золгүй явдлын улмаас нийт 28 хүн гэмтэж бэртсэн бөгөөд тэдний долоо нь хүндэвтэр байдалтай байгаа аж. Одоогоор энэхүү барилга юунаас болж нурсан болон төрсөн өдрийн эзэн, зочдод юу тохиолдсон талаар мэдээлэл алга байна.

Ослын газарт хэдэн зуун аврах ажилтан үнэрч нохой, кран болон өндөр түвшний мэдрэгч технологи ашиглан нурангид хайгуул хийж, амьд үлдсэн хүмүүсийг аврах ажиллагааг уйгагүй зохион байгуулжээ.

Хятадын Засгийн газрын Ажлын аюулгүй байдлын комиссоос уг ослын шалтгааныг шалгах ажлыг хянахаар болсон гэнэ. Тус улсын үйлдвэрлэлийн аюулгүй байдал сайжирсаар байгаа хэдий ч хөдөө орон нутагт барилгын стандартыг үл тоомсорлох нь элбэг. Нурсан барилгын байрлах Шаньси мужийн Сянфэн хошуу нь Хятадын нүүрсний ордны гол цэгүүдийн нэг бөгөөд сүүлийн жилүүдэд олон мянган уурхайчин дэлбэрэлт, нуралт, үерийн улмаас амиа алдсан байна.

Эх сурвалж: Associated Press

---