Орчны бохирдлыг бууруулах үндэсний хорооноос өвөлдөө эртлэн бэлдэх зорилгоор “Яндангаа хөөлье” аяныг улсын хэмжээнд зарлаж байна.

БОАЖ-ын сайд Д.Сарангэрэл "УИХ-аар Засгийн газрын мөрийн хөтөлбөрт Улаанбаатар хотын агаарын бохирдлыг 80 хүртэл хувиар бууруулах том зорилтыг тусган үндсэндээ батлах гэж байна. Хоёр жил хүрэхгүй хугацаанд агаарын бохирдлыг 50-50 хувиар бууруулсан. Одоо цаашлаад 80 хувьд хүргэхийг зорьж байгаа юм.

Өнгөрсөн жил Улаанбаатар хотын хэмжээнд угаарын хийнд хордсон 2,500 хүн эмнэлэгт ханджээ. Хэвтэн эмчлүүлэх тоо 200 орчимд хүрч, 15-20 хүн эндэж байна. Ингэхдээ гэр бүлээрээ эндэх тохиолдол ч гарч байгаа нь маш том асуудал юм.

Орчны бохирдлыг бууруулах үндэсний хорооноос есдүгээр сарын 1-нээс эхлэн "Яндангаа хөөлье" аяныг эхлүүлж байгаа юм. Яндангаа хөөлөөгүйн улмаас тортог хуримтлагдан бөглөрсөн, утаа гадагшлах зай багассан бодит жишээнүүд олон учраас мэргэжлийн байгууллагууд заавар, зөвлөгөө өгч, гарын авлага тарааж ажиллана. Цагдаагийн байгууллагаас гэр хорооллын гудамжаар дуут дохиотой явж, яндангаа хөөлөхийг уриална.

Улсын төсвийн 3,2 тэрбум төгрөгийн хөрөнгө оруулалтаар нийслэлийн гэр хорооллын айлуудад угаарын хий мэдрэгчийг суурилуулсан. Есдүгээр сараас эхлэн дахин 15 мянган угаар мэдрэгчийг суурилуулна. Угаар мэдрэгчийг өрөө болгонд суурилуулах шаардлагатай. Мөн батарейгаа шалгаж солихыг зөвлөж байна" гэлээ.

---