Өнөөдөр УИХ-ын ээлжит бус чуулганы хаалтаас өмнө УИХ дээр хоёр ч лобби бүлэг байгуулагдаж байгаа ажээ. 

Ш.Адьшаа тэргүүтэй гишүүд "Баруун бүсийн байгаль орчныг хамгаалах, агаар, хөрсний бохирдлыг бууруулах" лобби бүлэг байгуулж ажиллахаар болсон байна.

Харин УИХ-ын гишүүн Ж.Чинбүрэн нар "Ардын эрүүл мэндийг дэмжих лобби бүлэг" байгуулжээ.

Тус бүлэг Эрүүл мэндийн даатгалын тогтолцоо, санхүүжилтийн шинэчлэлээр идэвхтэй ажиллах юм байна.  Эрүүл мэндийн даатгалын тогтолцолцоонд шинэчлэл хийгдсэнээр эрүүл мэндийн даатгал төлдөг иргэн бүр эмч, эмнэлгээ сонгон үйлчлүүлэх эрхтэй болох, Даатгалын сантай гэрээ байгуулсан улсын болон хувийн бүх эмнэлэг ижил тарифаар иргэдэд үйлчлэх учир улсын эмнэлгүүдийн ачаалал буурах, хөнгөлөлттэй үнэтэй эмийг зөвхөн өрхийн болон сумын эмчийн жороор олгодгийг болиулж, аль ч эмнэлгийн эмчийн бичсэн жороор олгодог болох, хуурамч эмийг зах зээлээс шахан гаргах, гүйцэтгэлээр санхүүжилт хийгддэг болсноор эрүүл мэндийн салбарынхны хөдөлмөрийн үнэлгээ бодитоор нэмэгдэнэ гэж үзэж байгаа ажээ.

Дээрх хоёр лобби бүлгээс гадна УИХ-ын гишүүн Ж.Мөнхбат санаачлан "Хөдөө аж ахуйн хөгжлийг дэмжих, бүтээгдэхүүний экспортыг нэмэгдүүлэх" чиглэлээр ажиллах лобби бүлэг байгуулан ажиллаж эхэлсэн билээ. Ийнхүү шинэ УИХ гурван лобби бүлэгтэй боллоо. 

---