Эрүүл мэндийн яамны /2020-08-28/ 11 цагийн ээлжит хэвлэлийн бага хурал эхэллээ.

ЭМЯ-ны хэлтсийн дарга Д.Нарангэрэл "Сүүлийн 24 цагийн хугацаанд 267,000 хүн шинээр халдвар авч, 6,000 гаруй хүн эндсэн бөгөөд өмнөх өдрөөс өссөн үзүүлэлттэй байна.

Олон оронд халдвар дахин голомтлон гарч байгаа нь сүм хийд, цэнгээний газрууд, олон нийтийн арга хэмжээнээс үүдэлтэй байгааг ДЭМБ-аас мэдээллээ.

Дэлхийн улс орнуудад авч хэрэгжүүүлж байгаа арга хэмжээнүүдийн талаар мэдээлэл өгөв.

• Европын орнуудад дахин халдвар гарч байгаа тул амны хаалт хэрэглэх асуудлыг журамлаж эхэлсэн байна. Тухайлбал, Парис хотын оршин суугчид өнөөдрөөс гадуур явахдаа заавал амны хаалт зүүх ёстой болжээ. Хэрвээ амны хаалт зүүгээгүй бол торгох юм байна.
• Испани улсад зургаан наснаас дээш бүх хүүхдүүд хичээлийн үеэр заавал амны хаалт зүүх ёстой гэсэн журам гаргажээ.
• Хичээлийн шинэ жил эхэлж байгаатай холбоотойгоор АНУ-ын Хүнс, эмийн хяналтын албанаас спиртэн суурьтай гар халдваргүйжүүлэгчийн талаар сануулга гаргасан байна. Гар ариутгагчийг шоколад, жимсний үнэртэйгээр үйлдвэрлэх болсон тул хүүхдүүд андуурч хэрэглээд хордох, цаашлаад амь насаа алдах эрсдэлтэйг анхааруулжээ.

ХӨСҮТ-ийн Тандалт, судалгааны албаны дарга А.Амбасэлмаа "ХӨСҮТ, Дархан-Уул аймгийн салбар лабораториудад наймдугаар сарын 27-нд нийтдээ 471 хүнд коронавирусийн шинжилгээ хийхэд, бүх сорьц “Сөрөг” гарч коронавирус илрээгүй байна.

Коронавирус илрээгүй шинжилгээ:

• Наймдугаар сарын 27-нд Франкфурт-Улаанбаатарын онгоцоор ирсэн 259 хүний шинжилгээ,
• Алтанбулагийн боомтоор ирсэн ачаа тээврийн 19 жолоочийн шинжилгээ,
• Гадаад улс руу явах хүсэлт гаргасан 13 хүний шинжилгээ,
• Тусгаарлах байранд ажиллаж буй 19 эмч, ажилтан
• Тандалтын зорилгоор сорьц авсан 5 хүний шинжилгээ,
• Сэлэнгэ аймагт тусгаарлагдсан 68 хүний давтан шинжилгээ
• Дархан-Уул аймагт тусгаарлагдсан 64 хүний давтан шинжилгээ
• ХӨСҮТ-д тусгаарлагдсан 1 хүний давтан шинжилгээ
• Сувиллын ажиглалтад байгаа 14 хүний давтан шинжилгээ
• Тусгаарлан ажиглах байранд байгаа 9 хүний давтан шинжилгээнд коронавирус илрээгүй.

Монгол улсад зөөвөрлөгдөн орж ирж батлагдсан тохиолдол 301, эдгэрсэн 291 буюу 96,6 хувийг эмчилсэн байна. Эдгэрсэн хүмүүсээс сувиллын ажиглалтад 33 хүн, гэрийн ажиглалтад 35 хүн байгаа бол ажиглалт, тандалтын хугацаа дууссан 223 хүн байна.

ХӨСҮТ-д өнөөдрийн байдлаар 10 хүн эмчлэгдэж байгаа бөгөөд есөн хүний биеийн байдал хөнгөн, нэг хүнийх хүндэвтэр байна. Нийтдээ ХӨСҮТ-д 32 хүн ажиглалт,тандалт эмчилгээнд байгаа”гэв

---