Цар тахлын үед олон улсын байгууллагаас авсан зээл тусламж, гадаадаас иргэдээ татан авч буй ажлын талаар Гадаад харилцааны яамнаас мэдээлэл хийлээ Тус яамны Олон талт хамтын ажиллагааны газрын захирал Д.Гэрэлмаа "Цар тахлын эсрэг тэмцэх ажлын хүрээнд НҮБ болон олон улсын бусад байгууллагатай хамтран ажиллаж байна. Тухайлбал, Монгол Улсын нийгэм, эдийн засгийн хөгжил, гадаад худалдааны үйл ажиллагаанд учирч буй сөрөг үр дагаврыг бууруулах, эдийн засгийг сэргээх, гадаадад оршин суугаа иргэдийн эрхийг хамгаалах чиглэлээр нэн тэргүүнд анхаарч ажиллаж байгаа.

Монгол Улс дахь НҮБ-ын Суурин зохицуулагчийн газраас санаачлан НҮБ болон түүний системийн байгууллага, бусад олон улсын байгууллагатай хамтран коронавирус Монгол Улсын нийгэм эдийн засагт ямар хор хөнөөл учруулж буй талаар томоохон судалгаа хийсэн. Судалгааны дүнгээс харвал цар тахлын нөлөө Монгол Улсад маш хүчтэй байгаа. Гэхдээ одоогийн байдлаар бүрэн мэдэгдээгүй, цаашид 2-3 жил үргэлжилнэ гэсэн таамаглал дэвшүүлсэн. Жишээ нь, ДНБ-ий 24 хувийг эзэлдэг уул уурхайн салбарын өсөлт 30 хувиар буурсан нь эдийн засгийг 10.7 хувиар буурахад нөлөөлсөн нь судалгаагаар гарсан" гэлээ.

Г.Энхгэрэл

---