Дэлхийн зах зээлд нэг тонн зэсийн үнэ өнөөдрийн байдлаар 6667 ам.долларын ханштай байна.

Хэдийгээр цар тахлын улмаас зэсийн үнэ буурч өнгөрсөн гуравдугаар сард хамгийн бага төвшинд хүрээд байсан боловч сүүлийн саруудад Лондоны Металлын биржид үнэ нь илт сэргэж, гуравдугаар сартай харьцуулахад 30 гаруй хувиар өсөөд байна. Түүнчлэн судалгааны байгууллагууд ч зэсийн ханшийн талаар эерэг таамаглал дэвшүүлээд байгаа юм.

“Голдман Сакс” банкны шинжээчдийн дэвшүүлж буй таамгуудыг хамгийн өөдрөг нь гэж үзэж болно. Ялангуяа, зэсийн хамгийн том хэрэглэгч болох Хятад Улс дэд бүтцийн салбараа дэмжиж, шинэ оны эхний улиралд цахилгаан шугам сүлжээнд үлэмж хэмжээний хөрөнгө оруулахаар төлөвлөж байгаа нь зэсийн үнэ өсөхөд нөлөөлөхүйц хүчин болж байна.

Америкийн хөрөнгө оруулалтын банк болох “Jefferies” Голдманы адилаар өөдрөг таамаглал дэвшүүлж байна. Зэсийн үнэ өснө гэсэн таамаг дэвшүүлэхэд хүргэж буй өөр нэгэн шалтгаан бол Швейцарийн “Glencore” компани Бүгд Найрамдах Ардчилсан Конго Улс дахь зэс, кобальтийн Мутанда гэдэг уурхайгаа хоёр жилийн хугацаанд хаах шийдвэрийг өнгөрсөн оны эцсээр гаргасан явдал юм.

Дүн шинжилгээний “Capital Economics” компанийн төсөөлж буйгаар, 2021 онд зэсийн үнэ 7500 ам.долларт хүрч, улмаар Оюутолгойн гүний уурхай ашиглалтад орох үед буюу 2025 онд 10 мянган ам.долларт хүрнэ гэсэн “хэт өөдрөг” таамаглалыг дэвшүүлжээ.

Эх сурвалж: economictimes.indiatimes.com

---