ОХУ-ын сөрөг хүчний удирдагч Алексей Навальный одоогоор Сибирийн Омск хотын эмнэлэгт ухаангүй байгаа бөгөөд түүнийг хордуулсан байж болзошгүй байгаа билээ. Тэгвэл Навальныйг эмчилж буй эмч нар түүнийг Оросоос гарган, өөр улсад шилжүүлэн эмчлэх зөвшөөрөл олгохоос татгалзаж байгаа аж. Тэд түүний биеийн байдлыг хэт хүнд байгаа гэж үзэж байгаа юм.

Эмч нар уг шийдвэрийг Навальныйг Германд хүргэх онгоц газардахаас ганцхан цагийн өмнө гаргасан байна. Навальныйгийн хэвлэлийн төлөөлөгч Кира Ярмыш “Алексейг нүүлгэн шилжүүлэхэд зориулж зохион байгуулсан онгоц нэг цагийн дараа газардах ёстой. Навальныйг тээвэрлэхийг хориглосон нь түүний аминд хүрэх гэсэн оролдлого” хэмээн олон нийтийн сүлжээнд бичсэн юм.

Омскийн түргэн тусламжийн эмнэлгийн ахлах эмч Навальныйгийн багт түүний биеийн байдал “тогтворгүй” байгаа тул тээвэрлэх боломжгүй гэж хэлээд өөр дэлгэрэнгүй мэдээлэл өгөөгүй байна. Үүний дараа тэрээр оффистоо орон, хаалгаа түгжээд, өөр асуултад хариулахаас татгалзжээ.

Харин Навальныйгийн ар гэрийнхний хэлснээр эмч нар саяхныг хүртэл Навальныйг гэр бүлийнх нь хараа хяналтад шилжүүлэн өгөхөд бэлэн гэдгээ мэдэгдэж байсан хэдий ч нүүлгэн шилжүүлэх онгоц ирэхээс хэдхэн цагийн өмнө гэнэт байр сууриа өөрчилсөн гэнэ. Түүнчлэн Навальныйг хордуулсан болохыг тус эмнэлгийн эмч нар албаар оношлохгүй байгаа гэж түүний баг үзэж байгаа юм.

Навальныйгийн эхнэр Юлия “Түүний биеийн байдал сайнгүй байгаа бөгөөд бид энэ эмнэлэгт итгэхгүй байна. Тиймээс түүнийг эмнэлгээс гарган бидний хараа хяналтад шилжүүлэн өгөхийг шаардаж байна. Бид Алексейг хараат бус эмнэлэгт, итгэж болох эмч нараар эмчлүүлэх болно" гэжээ.

Эх сурвалж: The Guardian

 

---