ОХУ-ын сөрөг хүчний удирдагч Алексей Навальныйн бие гэнэт муудан, эмнэлэгт хүргэгдсэн бөгөөд одоогоор ухаангүй байгаа билээ. Тэгвэл түүнийг хордуулсан байж болзошгүй гэдгийг хэвлэлийн төлөөлөгч нь мэдэгдэв.

Сибириэс Москва хүрэх онгоцонд сууж явсан түүний бие гэнэт муудан, ухаангүй болсон тул онгоц нь Омск хотод ослын буулт хийсэн юм. Эмнэлгийн эх сурвалж Навальныйн биеийн байдал хүнд байгааг мэдээлжээ.

Харин түүний хэвлэлийн төлөөлөгч Кира Ярмыш хэн нэгэн Навальныйн цайнд ямар нэгэн зүйл холин, түүнийг хордуулсан байж болзошгүй гэж үзэж байгаа аж. Тэрээр "Алексейг цайнд нь хольсон ямар нэг зүйлээр хордуулсан гэж бид таамаглаж байна. Тэр өглөөнөөс хойш зөвхөн цай л уусан. Эмч нар түүний уусан хорт бодисыг халуун шингэнээр дамжин түүнд хурдан шингэсэн гэж хэлсэн. Яг одоо Алексей ухаангүй байна" гэсэн юм.

Кира Ярмыш мөн Навальныйг эрчимт эмчилгээний тасагт амьсгалын аппарат зүүн, команд орсон байдалтай байгааг Твиттер сүлжээнд дэлгэжээ. Түүнчлэн тэрээр "Эмч нар эхэндээ ямар нэгэн мэдээлэл хуваалцахад бэлэн байсан хэдий ч одоо хорт бодисын шинжилгээ хойшлогдсон гэж байгааг харахад хугацаа хожих гэж хичээн, мэдэж байгаа зүйлээ хэлэхгүй байгаа нь тодорхой байна" гэсэн байна. Үүгээр зогсохгүй, эрчимт эмчилгээний тасаг одоо цагдаагийн ажилтнуудаар дүүрэн байгаа гэдгийг Ярмыш онцлов.

Хуульч, авлигын эсрэг тэмцэгч, өдгөө 44 настай Алексей Навальный нь Ерөнхийлөгч Путинг идэвхтэй шүүмжилсээр ирсэн. Тэрээр Путины Засгийн газрын эсрэг жагсаал зохион байгуулан, хэд хэдэн удаа ял эдэлж байсан билээ. Шоронд байх үеэр нь түүний бие мөн гэнэт муудаж байсан бөгөөд тэр үед ч бас Навальный өөрийг нь хордуулсан гэж сэжиглэж байсан юм.

Эх сурвалж: BBC 

---