Өнгөрөгч баасан гарагт Энэтхэгийн “Air India Express” компанийн тусгай үүргийн онгоц осолдож 18 хүн амиа алдсан байна.

Тус онгоц нь Саудын Арабаас Өмнөд Энэтхэгийн Керала муж дахь Кожикодегийн олон улсын нисэх онгоцны буудалд буух үедээ осолдож, онгоц хоёр хэсэг хуваагдсан аж. Ослын шалтгаан нь цаг агаар таагүй байсны улмаас онгоц буух зурвасаас давж газардсан гэж урьдчилан дүгнээд буй.

“Боинг-737” нисэх онгоцонд нийт 191 зорчигч тээвэрлэж явсан бөгөөд тэдний дунд бага насны арван хүүхэд байсан гэх мэдээллийг холбогдох албаныхан өгчээ. Ослын газарт аврах ажиллагаа явуулж, гэмтэж бэртсэн хүмүүсийг Каликут, Малаппурам дахь эмнэлгүүдэд хүргэн тусламж үзүүлж байгаа талаар Кералагийн Ерөнхий сайд Пинарайи Вижаян мэдэгджээ. Одоогоор 100 гаруй хүн эмчлүүлж буйн 30-ынх нь биеийн байдал хүнд байна.

Тус улсын эрх баригчдын зүгээс талийгаачдын ар гэрийнхэнд эмгэнэл илэрхийлж, тэтгэмж олгох тухай шийдвэр гаргажээ. Үүний зэрэгцээ Энэтхэгийн баруун хэсэгт орших Ахмадабад хотын эмнэлэгт гал гарсны улмаас найман өвчтөн нас баржээ. Осол орон нутгийн цагаар 03:00 цагт гарсан бөгөөд гал түймэртэй тэмцэх газрын ахлах ажилтан Ражеш Бхатт хэлэхдээ богино холболтоос болж гал гарсан гэнэ. Гал гарснаас нэг цагийн дараа унтраасан бөгөөд өвчтөнүүдийг өөр эмнэлэг рүү шилжүүлсэн байна.

Тус улсын ерөнхий сайд Нарендра Моди уг явдлын талаар харамсаж байгаагаа илэрхийлсэн бөгөөд энэ үйл явдлын гэм буруутныг тогтоохын тулд мөрдөн байцаалт явуулж байгаа хэмээн мэдэгдлээ.

---