Дэлхийн хамгийн том гүрэн АНУ-ын ерөнхийлөгчийн сонгууль гурван сарын дараа болно. Энэ сонгууль АНУ-ын төдийгүй дэлхий нийтийн анхаарлыг татаж байна.

Өдгөө АНУ-д коронавирусээр 4.7 сая хүн халдварлаж, 157 мянган хүн нас барснаар нэгдүгээрт жагсч байна. Үүнтэй холбогдуулан сонгуулиа цахимаар явуулж саналаа мэйлээр авч байна. Гэвч мэйлээр санал авах нь хоосон саналын хуудас гарах, саналыг луйвардах магадлалтай хэмээн одоогийн ерөнхийлөгч Д.Трамп үзэж сонгуулийг хойшлуулах саналтай байгаагаа илэрхийлсэн нь шуугиан тариад байна.  

Харин экс ерөнхийлөгч Барак Обама хүн бүрийн саналыг тоолсон эсэхийг шалгахыг уриалсан нь Ардчилсан намын улс төрийн хамгийн чухал шугам байв. Тэрээр “Санал өгөх бол америк хүн бүрт бурхнаас олгосон эрх. Үүнийг баталгаажуулахын төлөө бид чадах бүхнээ хийх ёстой” гэсэн юм. Энэ мэдэгдлээс гурван цаг гаруйн дараа ерөнхийлөгч Д.Трамп Цагаан ордны танилцуулгын өрөөндөө орж ирээд цахимаар санал өгөхийг эсэргүүцэж байгаагаа дахин мэдэгдсэн юм. Гэвч сонгуулийг хойшлуулахыг хүсэхгүй байгаагаа сэтгүүлчдэд хэлж өөрийн үгнээсээ урвасан юм.

Тэрээр “Цахим саналыг эсэргүүцэж байгаа боловч хоосон санал гарсан эсэхийг мэдэхийн тулд гурван сар хүлээхийг хүсэхгүй байна. Ухаантай хүмүүс үүнийг ойлгоно. Тэнэг хүмүүс үүнийг ойлгохгүй байж болно. Зарим хүн үүний талаар ярихыг ч хүсэхгүй” гэсэн юм.

Мөн пүрэв гаригт гаргасан шинэ судалгаагаар коронавирусын улмаас АНУ-ын эдийн засаг 33 хувиар буурсныг үзүүлсэн нь тус улсын түүхэн дэх хамгийн муу үзүүлэлт байв. Тус улсын улс төрийн түүхэн дэх хамгийн эгзэгтэй энэ цаг үед ерөнхийлөгч асан Барак Обама Америкийн ардчилал, арьс өнгөөр ялгаварлах үзэл, шударга ёсонд учирч болох аюулд санаа зовниж, сэтгэл түгшээж буйгаа Д.Трампад хатуу анхаарууллаа. Үүний дараа болсон нэг гайхмаар зүйл нь ерөнхийлөгч Трамп телевизээр сая сая америкчуудын нүдэн дээр саналыг цахимаар авах нь хууль бус үйлдэл гэж ярьсан юм.

АНУ дэлхийн хүн амын дөрвөн хувийг эзэлдэг боловч коронавирусын тархалт, өвчлөлийн 25 хувийг эзэлж байна. Гэвч энэ аймшигт хямралыг даван туулж тохиолдлын тоо бууж байгаа тухай Трамп буруу мэдээлэл хийсэн юм. Мөн одоогийн санал хураалтаар Трамп ялагдаж явна. 

ЭХ СУРВАЛЖ: "ЗУУНЫ МЭДЭЭ" СОНИН

---