Эрүүл мэндийн яамны 11 цагийн ээлжит хэвлэлийн бага хурал эхэллээ. Одоогийн байдлаар гаднаас зөөвөрлөгдөн орж ирсэн 291 тохиолдол бүртгэгдэж, 225 иргэн эдгэрээд байна.

ХӨСҮТ-ийн ерөнхий захирал Д.Нямхүү: "ХӨСҮТ-өөс долдугаар сарын 28-нд нийт 630 хүнд коронавирусийн шинжилгээ хийхэд 628 сорьц сөрөг гарч коронавирус илрээгүй. Харин хоёр хүний сорьцод коронавирус илэрлээ. Тусгаарлалтад байсан /50, 14 настай эмэгтэй/ иргэдийн давтан шинжилгээнээс вирус илэрлээ.

• 7 дугаар сарын 10-нд Истанбул-Улаанбаатарын онгоцоор ирсэн 258 хүний 3 дахь давтан шинжилгээ
• 7 дугаар сарын 28-нд Сөүл-Улаанбаатарын онгоцоор ирсэн 262 хүний шинжилгээ
• ХӨСҮТ-д тусгаарлагдсан гурван хүний давтан шинжилгээ
• Тандалтын зорилгоор түүврийн аргаар сонгосон 11 хүний сорьц /хан-Уул, Баянгол дүүргийн нэгдсэн эмнэлгийн сорьцоос сонгон авсан/
• Ажиглах байранд тусгаарлагдсан 60 хүний сорьц
• Алтанбулагийн боомтоор орж ирсэн ачаа тээврийн 26 жолоочийн сорьц
• Сэлэнгэ аймагт тусгаарлагдсан 3 хүний давтан шинжилгээ
• Дархан-Уул аймагт тусгаарлагдсан хянагдаж байгаа 5 хүний давтан шинжилгээг хийхэд бүгдэд нь коронавирус илрээгүй.

Мөн ХӨСҮТ-өөс гурван хүн эдгэрч, дараагийн шатны сувилал руу шилжсэн сайн мэдээтэй байна. 21-22 настай иргэд 16 хоног эмчлэгдэн гарлаа.

Монгол улсад 291 тохиолдол албан ёсоор бүртгэгдсэнээс эдгэрсэн 225, эмчлэгдэж буй 66 иргэн байна. Биеийн байдлыг дурдвал хөнгөн 62, хүндэвтэр дөрвөн иргэн байна" гэв.

 

---