АНУ-ын Ерөнхийлөгч Дональд Трампын дэвшүүлсэн ОХУ-ын Ерөнхийлөгч Владимир Путиныг дэлхийн тэргүүлэгч эдийн засагтай улсуудын "G7" буюу "Их долоо" бүлэгт эргэн урих саналыг ХБНГУ эсэргүүцэж буйг тус улсын Гадаад хэргийн сайд Хейко Маас мэдэгджээ.

ОХУ 2014 онд Украины Крымийн бүсийг эзэлснийхээ дараа Их долоогоос хөөгдөөд байсан билээ. Харин Орос улсыг Их долоод дахин багтаан, "G7"-г өргөжүүлэх саналыг Ерөнхийлөгч Трамп өнгөрсөн сард гаргаад байсан юм.

Тэгвэл Хейко Маас "Rheinische Post" сонинд өгсөн ярилцлагадаа ОХУ Крым болон Украины зүүн хэсэг дэх мөргөлдөөнийг шийдвэрлэх талаар тодорхой ахиц дэвшил гаргаагүй тохиолдолд тус улсыг Их долоод эргэн оруулах боломжгүй гэдгийг онцолсон байна. Орос улс Украин дахь мөргөлдөөнийг энхийн замаар шийдвэрлэн, дахин G7 форматын нэг хэсэг болох эсэх нь тэдний өөрсдийн сонголт гэдгийг Маас тэмдэглэжээ.

Гэхдээ ОХУ хөгжиж буй зах зээлийн бусад орнуудыг багтаасан өргөн цар хүрээтэй бүлэглэл болох "G20"-ийн нэг хэсэг хэвээр байгаа. Харин Трамп зөвхөн Орос төдийгүй бусад орнуудыг G7 уулзалтад урих саналыг гаргасан бөгөөд энэ талаар Гадаад хэргийн сайд Хейко Маас "G7 ба G20 бол тодорхой зохион байгуулалт, хэлбэртэй бүлэг. Бидэнд G11 эсвэл G12 гэх мэт бүлэг хэрэггүй" хэмээн байр сууриа илэрхийлсэн юм.

Европын холбооны зургаан сарын ээлжит удирдлагын эрхийг долдугаар сарын 1-нд авсан Герман улс Ливи болон Украин дахь мөргөлдөөнд дундыг баримтлан, энхээр шийдвэрлэхийг уриалж байгаа.

Эх сурвалж: Reuters

---