Дэлхий дахинд коронавирусийн халдвар тархалтын мэдээллийг хүргэж байна.

Коронавирус нь дэлхийн 216 улс, бүс нутагт бүртгэгдэн нийт 16 сая 161 мянган хүн өвчилж, 650 мянган хүн нас баржээ. Улмаар есөн сая хүн эдгэрээд байгаа юм. Сүүлийн 24 цагт 200 мянган хүн шинээр өвчилж, 4000 гаруй хүн нас барсан байна.

 АМЕРИКИЙН НЭГДСЭН УЛС

 АНУ-д өчигдөр 65,500 шинэ тохиолдол, 969 нас баралт нэмж бүртгэгдлээ. Ингэснээр тус улсын хэмжээнд халдвар авсан хүний тоо 4,165,000 гаруй болсноос, 145,900 гаруй хүн эндээд байна.

 БРАЗИЛ УЛС

 Халдварын тохиолдлын тоогоор дэлхийд хоёрдугаарт орж байгаа Бразил улсад өчигдөр 24,500 гаруй шинэ тохиолдол, 555  нас баралт бүртгэгдлээ. Тус улсад бүртгэгдсэн халдварын тоо өссөн дүнгээр 2,419,000 болсноос, 1.6 сая хүн эдгэрээд байна.

 ЯПОН УЛС

 Номхон далайн баруун бүсийн Япон улсад өчигдөр 835 тохиолдол шинээр бүртгэгдлээ. Тэдгээрийн 333 нь Канто бүсэд бүртгэгдэн, 239 нь нийслэл Токиод бүртгэгдсэн байна.

Есөн сая гаруй оршин суугчтай Токио хотын хувьд сүүлийн нэг сарын хугацаанд эмнэлэгт хэвтэн эмчлүүлсэн хүмүүсийн тоо тав дахин нэмэгдсэн байна. Одоогийн байдлаар 1,100 гаруй хүн хотын хэмжээнд эмнэлэгт хэвтэн эмчлүүлж байна .

Халдвар авсан хүмүүсийн тоо улам бүр нэмэгдэж байгаа тул эмнэлгийн орны тоог 1000-2000 болгон нэмэгдүүлэх чиглэлээр ажиллаж байгаа талаар тус улсын хотын Засаг захиргаанаас мэдээлсэн байна.

 БҮГД НАЙРАМДАХ СОЛОНГОС УЛС

 Солонгос улсад өчигдөр шинэ тохиолдлын тоо өмнөх өдрүүдээс буурч 25 тохиолдол бүртгэгдлээ. Шинэ тохиолдлуудын 16 нь гаднаас зөөвөрлөгдсөн бол дотоодод есөн тохиолдол бүртгэгдсэн байна. Мөн өдөр тус улсад нэг нас баралт бүртгэгдсэн талаар тус улсын өвчний хяналт сэргийлэлтийн төв мэдээлжээ.

 БҮГД НАЙРАМДАХ ХЯТАД АРД УЛС

 БНХАУ-ын эрүүл мэндийн үндэсний хорооны мэдээлснээр тус улсын эх газарт Ням гарагт 61 шинэ тохиолдол бүртгэгджээ. Шинээр илэрсэн тохиолдлуудын дөрөв нь гаднаас зөөвөрлөгдсөн бол 57 нь дотоодын халдвар байжээ.

Дотоодын халдварын 41 нь Шинжаан Уйгурын Өөртөө Засах бүс нутагт бүртгэгдсэн байна. Ням гарагийн байдлаар Шинжаан Уйгурт 178 тохиолдол батлагдаад байгаа бол 170 нь шинж тэмдэггүй халдвар бөгөөд нийтдээ 8700 гаруй хүнийг эмнэлгийн бус тусгаарлалтад ажиглаж байна.

 ХОНКОНГ

 Хонг Конгт өчигдөр 128 тохиолдол шинээр бүртгэгдлээ. Тэдний 103 нь дотоодын халдвар бол 25 тохиолдол гадаадаас зөөвөрлөгдсөн байна. Хонг Конгт бүртгэгдсэн нийт халдвар 2633 болсноос 18 хүн нас баржээ.

---