ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаагийн мэдээллийг хүргэж байна.

"ДЭМБ-ын долдугаар сарын 24-ний өдрийн мэдээллийн дагуу коронавирусийн эсрэг вакцины 166 судалгаа идэвхтэй байдлаар хийгдэж байна. Тэдгээрээс 141 эмнэлзүйн өмнөх шатны буюу амьтад дээр турших туршилтын шатандаа байгаа бол 25 нэр төрлийн вакцин эмнэлзүйн туршилтын шатандаа байна. Дээрх 25 вакцинаас зургаан вакцин эмнэлзүйн сүүлчийн шат буюу гуравдугаар шатны туршилтын судалгаагаа эхлүүлсэн.

Танилцуулбал:

• БНХАУ-ын Sinovac группийн хөгжүүлж буй “Coronavac" /коронавак/ нэртэй идэвхгүйжүүлсэн вакцин,
• БНХАУ-ын Синофарм группийн Уханийн биологийн бүтээгдэхүүний хүрээлэнтэй хамтран хөгжүүлж буй идэвхгүйжүүлсэн вакцин,
• БНХАУ-ын Синофарм группийн Бээжингийн биотехнологийн хүрээлэнтэй хамтран хөгжүүлж буй идэвхгүйжүүлсэн вакцин,
• Их Британийн Оксфордын их сургууль болон Астра Зенека биотехнологийн компанийн хамтран гаргаж байгаа вакцин,
• БНХАУ-ын Cansino biologics компани болон тус улсын Цэргийн анагаах ухааны академийн харьяаны Био технологийн хүрээлэнтэй хамтран хөгжүүлж буй "Ad5-nCoV" вакцин
• АНУ-ын Харшил, халдварт өвчин судлалын хүрээлэнгийн санхүүжилттэй Модерна компанийн хөгжүүлж буй шинэ коронавирусийн уургийн тогтворжсон хэлбэрийг агуулсан вакцин зэрэг нь сүүлийн шатандаа байна.

Вакцин бол эрүүл хүнд хийж хэргэлдэг өвөрмөц бэлдмэл юм. Вакциныг зөвхөн эрүүл хүмүүст хэрэглэх ёстой учир түүний аюулгүй байдал, үр дүнг гурван шатны судалгаагаар нотолж, амжилттай болсон тохиолдолд зөвшөөрлийг нь олгодог" гэв.

 

---