БНСУ-ын Засгийн газар гадаад иргэншилтэй коронавирусийн өвчтөнүүдээс эмчилгээний зардал авах хуулийг батлах шийдвэрийг өнгөрөгч ням гарагт гаргажээ. Энэхүү алхам нь гадаадаас ирсэн иргэдээс халдвар ихээр илэрч байгаатай холбоотой юм.

Одоогийн хуулиар бол цар тахлаар өвчилсөн хүмүүсийн эмнэлэгт хэвтэж, эмчлүүлэх зардлыг Өмнөд Солонгосын төр засгаас иргэншил үл хамааран даадаг. Тэгвэл шинэ хууль батлагдсанаар коронавирусийн халдвар авсан гэдгээ мэдсэн хэдий ч БНСУ руу аялсан, эсвэл хоёр долоо хоногийн тусгаарлалтын үеэр халдвартай болох нь тогтоогдсон гадаад иргэдээс эмчилгээний төлбөр шаардах журмыг тус улсын Эрүүл мэндийн яамнаас хэрэгжүүлэх ажээ. 

Мөн гадаадын иргэдээс эмчилгээний төлбөр авах нь дипломат харилцааны харилцан ашигтай байх зарчмыг харгалзан үзсэн явдал болохыг Эрүүл мэндийн сайд Пак Нынг Хү онцолсон байна. Тэрээр "Халдвар авсан Өмнөд Солонгосын иргэдээс эмчилгээний төлбөр шаардаж буй улс орнуудын иргэдээс бид мөн адил эмчилгээний зардал шаардах аваас гадаадад байгаа манай улсын иргэд коронавирусийн эмчилгээг үнэгүй авах боломж илүү өндөр болох болно" гэжээ.

Харин коронавирусийн шинжилгээ бүх улсын иргэдэд үнэ төлбөргүй хэвээр үлдэх юм. "Коронавирусийн шинжилгээ бол манай улсын аюулгүй байдлын арга хэмжээний нэг хэсэг. Гадаадын иргэдээс шинжилгээний зардал авах нь хэцүү асуудал гэж бодож байна" хэмээн Эрүүл мэндийн сайд Пак мэдэгджээ.

Өнгөрөгч ням гарагийн байдлаар Өмнөд Солонгост коронавирусийн 58 шинэ тохиолдол бүртгэгдсэн бөгөөд тус улсын нийт халдварын тоо 14,150-д хүрээд байна.

Эх сурвалж: The Korea Times

---