Хан-Уул дүүргийн Эрүүгийн хэргийн анхан шатны шүүхэд “Эрэл”-ийн хэмээх Б.Эрдэнэбат, түүний эхнэр Д.Сэргэлэн нарт холбогдох хэргийг долдугаар сарын 24-ний 13.30 цагт хэлэлцэхээр товлоод байв. “Номин холдинг”-ийн Ш.Баярсайхантай хөрөнгийн маргаанаас үүдэлтэйгээр тэдний гэм буруутай, эсэхийг хэлэлцэхээр болоод буй.

“Дэм санхүүгийн нэгдэл” буюу "Ариг" банкны толгой компанийн тэргүүн Б.Эрдэнэбат нь эхнэр Д.Сэргэлэн, хүү Э.Жаргалан, Э.Тэмүүлэн, Э.Тэмүүжин, охин Э.Өүлэн нарынхаа нэр дээр “Ариг” банканд байсан 10 тэрбум орчим төгрөгийн хадгаламжийг татсан, хамаарал бүхий компаниудынхаа нэрээр тус банкнаас чанаргүй зээл ихээр авсан нь эрсдэлд оруулсан гэж буруутгаж байгаа.

“Эрэл”-ийн үүсгэн байгуулагч, “Дэм санхүүгийн нэгдлийн” захирал Б.Эрдэнэбат, эхнэр Д.Сэргэлэн нарыг Эрүүгийн хуулийн 17.3-2.2-т заасан “Бодит байдлыг нуух замаар бусдыг төөрөгдөлд оруулж, урьдын харилцааны явцад бий болсон итгэлийг урвуулан ашиглаж бусдын эд хөрөнгийг залилж ноцтой хохирол учруулсан”, 18.6-2.2 дахь хэсгийн “Гэмт хэргийн улмаас олсон хөрөнгө, мөнгө, орлого гэдгийг мэдсээр байж түүнийг авсан, эзэмшсэн, ашигласан, түүний хууль бус эх үүсвэрийг нь нуун далдлах хэргийг байнга тогтвортой үйлдсэн” буюу энгийнээр тайлбарлавал, мөнгө угаасан гэх үндэслэлээр яллагдагчаар тооцон шүүхэд шилжүүлсэн юм.

Шүүхийн хэлэлцүүлэг эхлэхийн өмнө шүүгдэгч нар шинээр өмгөөлөгч нэмж авсан тул хавтаст хэрэгтэй танилцах боломжоор хангуулах, өмнө нь авсан өмгөөлөгч Н.Цэцэгмаа өвчтэй гэсэн шалтгаанаар хурлыг хойшлуулах хүсэлт гаргасан юм. Мөн өмгөөлөгч Д.Отгонбат нь санхүүгийн дүгнэлт гаргасан шинжээч болон хохирогч "Улаанбаатар импэкс" буюу "Номин холдинг"-ийн тэргүүн Шагдарсүрэнгийн Баярсайханыг оролцуулах хүсэлт гаргасныг шүүгч хүлээн авч, хурлыг наймдугаар сарын 5-ны 13.30 цагт хэлэлцэхээр хойшлууллаа.

Эх сурвалж: Г.Равжаа

---