Улсын Онцгой комиссын Шуурхай штабаас цаг үеийн асуудлаар мэдээлэл хийлээ.

ГХЯ-ны Консулын газрын захирал Л.Мөнхтүшиг:" Цар тахал гарж Монгол улс хилээ хааснаас хойш 14,371 иргэнийг автозам болон агаарын замаар татан аваад байна. Гэвч иргэдийн дунд буруу ойлголт байсаар байна. 67 мянган иргэнийг татан аваагүй шүү дээ гэдэг. Монгол Улсын Засгийн газар, УОК-ын шийдвэрээр агаарын болон авто замын хилээ үе шаттай бүрэн хаасан. Нэгдүгээр сарын дунд үеэс Монгол Улсын иргэдийн амь нас, аюулгүй байдлыг хангах үүднээс урьдчилан сэргийлэхээр гадаад улсаас ирж буй хүмүүсийг нэвтрүүлэх тодорхой дүрмийг мөрдөж эхэлснээс хойш улсын хилээр орж ирсэн хүний тоо 67,000 гаруй болсон.

Гадаад улсаас иргэдээ татан авахаар долдугаар сард 11 нислэг хийхээр төлөвлөж байсан бол тусгаарлах байрны нөөц боломжийг нэмэгдүүлснээр нийт 14 нислэгээр 2,445 иргэнээ татан авахаар ажил үргэлжилж байна.Одоогоор 55 улсаас 11,951 иргэн нутаг буцах хүсэлтээ гаргасан.

Монгол руу ирэх иргэдийн тоо яагаад 10 мянгаас буурахгүй байна вэ?

Гуравдугаар сараас Элчин сайдын яамд нутаг буцах хүсэлтэй иргэдийн өргөдлийг хүлээн авч эхэлсэн. Энэ үед 3,000 гаруй иргэн өргөдлөө өгсөн байсан бол өнөөдрийн байдлаар энэ тоо 11,951 болсон. Харин татан авсан иргэний тоо 14,000 гарсан. Манай улсын 46 мянган иргэн БНСУ-д ажиллаж амьдардаг. Тэндээс хамгийн олон иргэн эх орондоо ирэх хүсэлтэй байна.

Хүсэлт гаргасан иргэдийн өргөдлийг агуулгаар нь авч үзвэл 11,951 хүний 5,497 нь УОК-оос тавьж буй таван шалгуурт нийцэхгүй байна. Харин одоо энэ шалгуурт хамрагдахааргүй хүмүүс хилийн чанадад тунаж үлдээд байна.

Гадаад харилцааны сайд Н.Энхтайван ажлаа хүлээн авснаасаа хойш гадаад дахь Элчин сайдын яамдад тодорхой чиглэл өгсөн буюу татан авах хүртэл хугацаанд тухайн иргэнд тулгарсан асуудал, хүндрэл бэрхшээлийг шийдвэрлэхэд туслах, иргэн бүрийн өргөдөл хүсэлтэд хариу өгч байхыг үүрэг өглөө. Мэдээллийн ил тод байдлыг хангахдаа өргөдөл гаргасан иргэдийн овог нэр, бүртгүүлсэн огноог л мэдээлнэ. Бусад мэдээллийг нийтлэхгүй.

 

---