БНХАУ АНУ-ыг Ченду дахь консулын газраа хаахыг өнөөдөр буюу долдугаар сарын 24-ны өдөр тушаажээ. Үүнээс өмнө АНУ Хьюстон дахь Хятадын консулын газрыг үүд хаалгаа барихыг шаардаад байсан билээ.

Хьюстоны консулын газрыг чөлөөлөх 72 цагийн хугацаа хүлээн авсан БНХАУ Вашингтоныг асуудлыг дахин бодолцож үзэхийг уриалсан бөгөөд үгүй бол хариу арга хэмжээ авна гэдгээ сануулаад байсан. Хятадын Гадаад хэргийн яамны мэдэгдэлд "АНУ-ын энэ алхам нь олон улсын хууль тогтоомж, олон улсын харилцааны үндсэн хэм хэмжээ болон БНХАУ, АНУ-ын Консулын конвенцын нөхцөлийг ноцтойгоор зөрчсөн. Энэхүү шийдвэр Хятад-Америкийн харилцаанд ноцтой хор хохирол учруулсан" гэсэн байжээ.

Уг мэдэгдэлд үргэлжлүүлэн "БНХАУ-ын Гадаад харилцааны яам нь Ченду дахь АНУ-ын Ерөнхий консулын газрын оршин тогтнох, үйл ажиллагаагаа явуулах зөвшөөрлийг хүчингүй болгохоор шийдсэн тухайгаа АНУ-ын Хятадад суугаа элчин сайдын яамд мэдэгдсэн" гэсэн байв. Бээжин дэх АНУ-ын элчин сайдын яамнаас энэ талаар тайлбар өгөхөөс татгалзаад байгаа юм.

Вашингтон, Бээжингийн харилцаа энэ жил худалдаа, технологи, коронавирус болон Хонконгийн асуудлаар огцом муудаад байгаа. АНУ-ын Төрийн нарийн бичгийн дарга Майк Помпео өнгөрөгч пүрэв гарагт хийсэн мэдэгдэлдээ Вашингтон болон түүний холбоотнууд хамтран Хятадын Коммунист Намыг өөрчлөхийн тулд "илүү бүтээлч, баттай арга" ашиглан ажиллах нь зүйтэй гэдгийг тэмдэглээд, үүнийг "бидний цаг үеийн даалгавар" хэмээн нэрлэжээ.

Эх сурвалж: Reuters

 

---