ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаагийн мэдээллийг хүргэж байна.

Сүүлийн 24 цагт дэлхий дахинаа 202,600 хүн шинээр коронавирусийн халдвар авч, 4,200 гаруй хүн энджээ.

Түүнчлэн ДЭМБ-ын ээлжит хэвлэлийн хурлын үеэр “Шинэ коронавируст халдварын эсрэг вакцин бүтээх үйл ажиллагаа идэвхтэй явагдаж байна. Одоогийн байдлаар хэд, хэдэн вакцин эмнэлзүйн гуравдугаар шатны туршилтад байна. Хэрвээ вакцин амжилттай болбол, аюулгүй байдлыг хангасан гэх гэрчилгээ олгон олон тоогоор үйлдвэрлэнэ. Ингээд дэлхий нийтэд хүргэхэд хугацаа шаардлагатай. Тиймээс 2021 он хүртэл вакциныг хүлээх хэрэгтэй болно. Тиймээс үүний наана улс орнууд халдвараас маш сайн сэргийлэх шаардлагатай. Халдварын гинжийг эмнэлгийн бус буюу нийгмийн эрүүл мэндийн арга хэмжээг хэрэгжүүлж таслах боломжтой” хэмээн анхааруулсан гэв.

АМЕРИКИЙН НЭГДСЭН УЛС

АНУ-д өчигдөр 67,000 гаруй шинэ тохиолдол, 1,047 нас баралт нэмж бүртгэгдлээ. Ингэснээр тус улсын хэмжээнд бүртгэгдсэн халдварын тоо 3,882,000 гаруй болж, 141,600 гаруй хүн энджээ.

БРАЗИЛ УЛС

Өнгөрсөн 24 цагийн хугацаанд Бразил улсад шинээр 67,800 гаруй хүн халдвар авсан нь батлагджээ. Энэ нь халдвар анх дэгдсэн цагаас хойших нэг өдрийн дотор бүртгэгдсэн хамгийн өндөр үзүүлэлт болсон юм.

Тус улсад бүртгэгдсэн нийт халдварын тохиолдол 2,227,000 болсон бөгөөд 1,532,000 нь эдгэрсэн бол 82,700 хүн уг өвчний улсаас амиа алдаад байна.

БҮГД НАЙРАМДАХ ЭНЭТХЭГ УЛС

Зүүн Өмнөд Азийн бүсийн Энэтхэг улсад өчигдөр 37,700 гаруй шинэ тохиолдол бүртгэгдэж, нийт халдварын тоо 1,192,000-д хүрсэн байна.

ЯПОН УЛС

Номхон далайн баруун бүсийн Япон улсад өчигдөр 795 шинэ тохиолдол бүртгэгдлээ. Тэднээс 240 орчим нь Токио хотод бүртгэгдсэн байна. Иймд Токио хот эрсдлийн зэргээ хамгийн өндөр түвшинд хүргээд байгаа юм.

АВСТРАЛИ УЛС

Австралийн холбооны улс өчигдөр иргэдийнхээ дунд 56,000 гаруй сорьцод шинжилгээ хийж, 502 тохиолдлыг илрүүлжээ. Шинэ тохиолдлуудын 484 нь Виктория мужид дангаараа бүртгэгдсэн байна.

БҮГД НАЙРАМДАХ СОЛОНГОС УЛС

Өмнөд Солонгос улсад өчигдөр 59 тохиолдол шинээр бүртгэгдлээ. Тэднээс 39 нь дотоодын халдвар байсан бол үлдсэн нь гаднаас зөөвөрлөгдсөн байна.

Тус улсын Цэргийн ангид халдварын шинэ голомт гарч, тухайн голомтоос 13 цэрэг халдвар авсан нь батлагдсан. Иймд хавьтлыг судалж, шинжилгээ хийх болон халдварын эх уурхайг тогтоох ажлыг батлан хамгаалах салбарын тархвар судлаач нар гүйцэтгэж байна.

БҮГД НАЙРАМДАХ ХЯТАД АРД УЛС

БНХАУ-ын эх газарт 22 шинэ тохиолдол бүртгэгдсэний 19 нь дотоодын халдвар байна. Тэдний 18 нь Шинжаан Уйгурын Өөртөө Засах бүс нутагт бүртгэгджээ. Тус бүс нутагт өчигдөр нэг сая гаруй хүний сорьц цуглуулж, 27 лабораторид шинжилж эхэлсэн байна.

Долдугаар сарын 15-ны өдрөөс хойш Шинжаан Уйгурт нийт 82 тохиолдол батлагдсан байгаа. Бээжин хотын Шиньфади хүнсний захтай холбоотой 335 тохиолдлоос өнөөдрийн байдлаар 256 нь эдгэрсэн. Мөн БНХАУ-ын хэмжээнд эмнэл зүйн шинж тэмдэггүй 164 тохиолдлыг эмнэлгийн хяналтад ажиглаж байна.

ХОНКОНГ

Хонг Конгт өчигдөр 116 шинэ тохиолдол бүртгэгдлээ. Шинэ тохиолдлуудын 105 нь хүн амын дундах дотоодын халдвар байсан аж.

Сүүлийн өдрүүдэд тус бүсэд халдвар улам нэмэгдэж байгаа тул дэлгүүр, худалдааны зах зэрэг олон нийтийн газруудад амны хаалт заавал зүүхийг албан ёсоор шаардаж эхэлжээ.

 

 

---