Бүгд Найрамдах Грек Улсын хилээр цагаачдыг хууль бусаар нэвтрүүлсэн ОХУ-ын хоёр далайчинд Грек улсын шүүхээс хууль бус цагаачдыг тээвэрлэн, хүний наймаа эрхэлсэн хэргээр 253 жилийн хорих ял оноосон болохыг Оросын НҮБ-ын Хүний эрхийн хорооны Дэд ерөнхийлөгч Иван Мельников мэдэгджээ.

Тэрээр "Константин Семенов, Иван Возниковцев нар Грекийн хилийг хууль бусаар давж, хүний наймаа эрхлэн, цагаачдыг хууль бусаар хил давуулахыг завдсан хэргээр 253 жилийн хорих ял сонссон. Энэхүү ял ОХУ-ын Эрүүгийн хуульд заасны дагуу бол 20-иод жилийн хорих ялтай дүйцэж байгаа" гэсэн байна. Грекийн шүүх далайчдыг ийнхүү хатуу шийтгэсэн нь тэдний тээвэрлэсэн цагаач бүрийн тоонд 7-12 жилийн хорих ял оноосонтой холбоотой гэв.

Харин хоёр орос далайчин өөрсдийгөө гэм буруугүй гэж мэдүүлсэн байна. Константин Семенов, Иван Возниковцев нар эхэндээ Турк улсад ажиллахаар ирээд байжээ. Ингээд бэлтгэлийн хугацааны дараа далайд гарсан тэдний дарвуулт онгоц удаа дараа эвдэрсэн тул тэд энэ тухай өөрсдийн ажил олгогчид мэдэгдсэн байна. Гэвч удалгүй тэдний завь дээр сэлбэг хэрэгсэл биш харин хууль бус цагаачид ирсэн гэнэ. Ажил олгогч нь тэднийг сүрдүүлсэн учир Семенов, Возниковцев хоёр цагаачдыг завин дээрээ гаргахаас өөр аргагүй болсон аж. Удалгүй эргийн хамгаалагч нарт баригдсан хоёр орос иргэн ийнхүү хүний наймааны хэрэгт буруутгагдсан болохыг Иван Мельников онцолжээ.

Эх сурвалж: ТАСС

---