УБЕГ-ын Хамтын ажиллагаа, сургалтын хэлтсийн дарга Г.Хэрлэнгээс иргэдийн шилжилт хөдөлгөөнийг түр хязгаарлахтай холбоотой зарим зүйлийг тодрууллаа.

Аймаг, нийслэл, сум, дүүргийн иргэдийн Төлөөлөгчдийн хурлын сонгуулийг аравдугаар сарын 15-нд явуулахаар товлосон. Сонгуулийн тухай хуулийн нэмэлт, өөрчлөлтөөр иргэдийн шилжилт хөдөлгөөнийг түр хязгаарлах хуулийн зохицуулалттай. Энэ ажлыг хэзээнээс эхлэх вэ?

-УИХ-ын сонгуулийн тухай хуульд зааснаар шилжилт хөдөлгөөнийг хоёрдугаар сарын 1-нээс зогсоогоод, санал авах өдрийн дараах өдрөөс сэргээсэн. УИХ-аар Орон нутгийн хурлын сонгууль буюу аймаг, нийслэлийн ИТХ-ын сонгуулийн тухай хуулийг нэгдүгээр сарын 30-нд баталсан. Үүнтэй холбогдуулан УИХ-аар 2020 оны орон нутгийн ээлжит сонгуулийн санал авах 23 дугаар тогтоолыг 2020 оны дөрөвдүгээр сарын 14-нд баталсан. Уг тогтоолд аймаг, нийслэл, сум, дүүргийн ИТХ-ын сонгуулийн санал авах өдрийг 2020 оны аравдугаар сарын 15-ны өдөр байхаар заасан. Энэ хүрээнд УБЕГ санал авах өдрөөс 60 хоногийн өмнө шилжилт хөдөлгөөнийг зогсооно гэж заасан байдаг. Уг 60 хоног нь наймдугаар сарын 16-ны өдөр. Тэгэхээр шилжилт хөдөлгөөн зургадугаар сарын 25-нд нээгдээд, наймдугаар сарын 16-ны өдөр зогсоно. Дээрх хугацаанд иргэд шилжилт хөдөлгөөн хийх боломжтой.

Шилжилт хөдөлгөөн хязгаарласан болон хязгаарлаагүй үеийг харьцуулбал нөхцөл байдал өнөөдөр ямар байгаа бол?

-Шилжилт хөдөлгөөн нэмэгддэг оргил үе гэж байдаг. Тэр нь жил бүрийн найм, есдүгээр сар. Энэ нь сургууль, цэцэрлэг, их дээд сургуулиуд элсэлтээ авч хичээлийн шинэ жил эхэлдэгтэй холбоотой. Ер нь өмнөх онуудад ч мөн адил найм, есдүгээр сард шилжилт хөдөлгөөн нэмэгдэж байсан.

Шилжилт хөдөлгөөнтэй холбоотой баримт бичгийн талаар товч хариулт өгөөч?

-2018 оны зургаадугар сарын 21-нд Улсын бүртгэлийн тухай багц хууль батлагдаж, арваннэгдүгээр сарын 1-нээс нь хүчин төгөлдөр мөрдөгдөж эхэлсэн. Хууль батлагдахаас өмнө иргэд шилжилт хөдөлгөөн хийхдээ тухайн аймаг, нийслэлээсээ хавтас авдаг байсан. Одоо хууль шинэчлэгдсэнээр хавтас нээх шаардлагагүй болсон. Харин шилжиж очсон газраа шууд бүртгүүлдэг болсон.

УБЕГ шилжилт хөдөлгөөнд хяналт тавьж байгаа юу?

-УБЕГ-т Хяналт шалгалтын газар гэж бий. Иргэд шилжилт хөдөлгөөн хийхэд тухайн иргэний хаяг дээр өөр хүний хаяг байх эсвэл зөрчилтэй байвал УБЕГ-т өргөдөл гаргаж болно. Уг өргөдлийг манай Хяналт шалгалтын газар хяналт тавьж ажилладаг.  

---