Бразил улсын Эрүүл мэндийн яам өнгөрөгч пүрэв гарагт мэдэгдэл хийн, тус улсын коронавирусийн халдварын батлагдсан тохиолдол хоёр сая давж, 76 мянган хүн нас бараад байгаа талаар мэдээллээ.

Тус улсад коронавирусийн анхны тохиолдол бүртгэгдсэн тавдугаар сарын сүүлчээс хойш өдөр тутмын нас баралтын тоо дунджаар мянга гаруй байгаа бөгөөд энэ үзүүлэлт ойрын хугацаанд буурах төлөвгүй байна. Хэдийгээр Бразилын хамгийн том бөгөөд хамгийн хүнд цохилтод орсон хотуудын халдварын нөхцөл байдал дээрдэж байгаа ч цар тахал шинэ байршлуудад хурдацтай тархаж байгаа юм.

Мэргэжилтнүүд Ерөнхийлөгч Жайр Болсонарогийн коронавирусийн үхэлд хүргэх аюулыг үгүйсгэсэн явдал болон улс даяар халдварын эсрэг зохион байгуулалт дутмаг байгааг буруутгаж байгаа билээ. Түүнчлэн хот, мужийн удирдлагууд бие биетэйгээ хамтран ажиллахгүй байгаа бөгөөд зарим засаг захиргааны нэгж эрүүл мэндийн мэргэжилтнүүдийн зөвлөснөөс өмнө хөл хориогоо цуцлаад байгаа аж.

Мөн Бразил улсад халдварын чиглэлээр мэргэшээгүй түр зуурын Эрүүл мэндийн сайд цар тахлын эсрэг хариу арга хэмжээг удирдан ажиллаж байгаа. Харин хөл хорионы дэглэмийг удаа дараа зөрчин, орон нутгийн удирдагчдын зөвлөгөөг үл тоомсорлож байсан Ерөнхийлөгч Болсонаро коронавирус тусаад байгаа юм.

Латин Америкийн хамгийн том улсад бүртгэгдээд буй хоёр сая тохиолдол нь АНУ-ын дараагаар бичигдэж байгаа хэдий ч шинжилгээний ажлын дутмаг байдлын улмаас энэхүү үзүүлэлт бодит байдлаас хамаагүй доогуур тоо гэж шинжээчид үзэж байна. Тус улсын хэд хэдэн эрдэм шинжилгээний байгууллагын профессоруудын бүтээсэн загварын дагуу нас барсан хүмүүсийн тоог харахад Бразилын халдварын тоо 10 саяд хүрсэн байх ёстой гэнэ.

Эх сурвалж: The Associated Press

---