Бангладеш улсын нэгэн эмнэлгийн эзэн коронавирусийн хуурамч оношлуур ашиглан, мянга мянган өвчтөнүүдэд худал шинжилгээний хариу гарган өгч, тэднээс нийт 350 мянган ам.доллар луйвардсан байна. Мухаммед Шахид гэх энэ эрэгтэйг цагдаа нар луйврын хэргээр лхагва гарагт баривчилжээ.

Тэрээр ес хоногийн турш хууль хяналтынхнаас зугтсан бөгөөд албаныхан түүнийг "Бурка" буюу исламын шашны уламжлалт эмэгтэйчүүдийн өмсгөл өмсөөд, хөрш зэргэлдээ Энэтхэг улс руу оргон зайлахаар гол гаталж байх үед нь барьсан байна. Пүрэв гарагт гарсан шүүхийн шийдвэрийн дагуу цагдаа нар түүнийг арван хоног саатуулан, байцаалт авах болно.

43 настай Шахид өвчтөнүүдэд бүх хариу нь "Сөрөг" гардаг хуурамч коронавирусийн оношлуур хэрэглэсэн болохыг гэж тус улсын Шуурхай ажиллагааны батальоны хэвлэлийн төлөөлөгч, хурандаа Ашик Билла мэдэгдсэн юм. Үүний дээр Шахид иргэдийг үнэ төлбөргүйгээр вирусийн эмчилгээнд хамруулж, коронавирусийн халдвар аваагүй гэх эмнэлгийн баримт бичиг олгоно хэмээн Бангладешийн Засгийн газартай тохиролцсон хэдий ч тэрээр иргэдээс төлбөр авч байсан нь тогтоогдсон байна. Биллагын хэлснээр Шахидын эзэмшдэг хоёр эмнэлгийн байгууллага нь 4,000 орчим үнэн зөв коронавирусийн шинжилгээ хийсэн ч өөр бусад 6,500 шинжилгээний үр дүнг хуурамчаар үйлдвэрлэжээ.

Гэвч Шахид тус улсад цар тахлын үеэр эмнэлгийн луйвар хийсэн хэргээр баривчлагдсан анхны хүн биш юм. Өнгөрсөн долоо хоногт өөр нэг хувийн шинжилгээний төвийн эзэд иргэдэд шинжилгээ хийгээгүй хэдий ч, хуурамч эмнэлгийн хуудас гарган өгч байсан хэргээр баривчлагджээ. Эдгээр луйвар бангладеш иргэдийг коронавирусийн шинжилгээ өгөхөөс зайлсхийхэд хүргэх вий гэж мэргэжилтнүүд санаа зовж байна. Тус улсад шинжилгээ өгөхийг хүссэн олон хүмүүс урт эгнээнд дараалан, заримдаа шөнөжин хүлээхээс өөр аргагүй болоод байгаа аж. Тэгвэл энэ хэргийн улмаас олон нийт улам их бухимдан, тэдний оношлуурт итгэх итгэл нь огцом буурч байгаа ажээ.

Эх сурвалж: CNN

---