Баяр наадмын өдрүүдээр их хэмжээний бороо орсны улмаас орон нутгийн зарим замд эвдрэл, гэмтэл гаран, хөдөлгөөний хязгаарлалт хийгээд байгаа билээ. Энэ талаар ЗТХТ-ийн Зам засвар, арчлалтын хяналтын хэлтсийн дарга А.Ханбаяраас тодрууллаа.

А.Ханбаяр: "Энэ онд зургадугаар сарын 21-нээс үер усны улмаас авто зам эвдрэх асуудал гарж эхэлсэн. Баяр наадмын өдрүүдэд Увс, Баян-Өлгий, Хөвсгөл, Өвөрхангай, Төв аймаг зэрэг нийт таван аймагт үер усны улмаас авто зам дээр эвдрэл, гэмтэл үүссэн. 

Олон улс болон улсын чанартай авто замыг хариуцдаг 32 зам засварын компани улс даяар ажилладаг. Тухайн аймгийн зам засвар хариуцсан компаниуд яг одоо газар дээрээ засварын ажлууд хийж байгаа. Баян-Өлгий, Увс аймагт гүүрний ноцтой эвдрэлүүд гарсан. Увсын Түргэний болон Шургадгийн сайрын гүүрнүүд 1988, 1989 оны үед ашиглалтад орсон. Харин Баян-Өлгийн гүүр 1976 онд баригдсан. Одоогоор тухайн эвдрэлийн ажлын тоо хэмжээг тогтоох, хөдөлгөөний аюулгүй байдлыг хангах ажил хийгдэн байна. Засварын ажил хараахан эхлээгүй байгаа бөгөөд үерийн ус бүрэн татраагүй байгаа учир эхлэх боломжгүй байна.

Замын эвдрэл гэмтлийн улмаас зарим замд хязгаарлалт тавиад байгаа. Хөвсгөл аймгийн Мөрөн-Хатгалын чиглэлд хөдөлгөөний эрчим их байна. Мөрөн сумд 2-3 км-ийн түр зам гаргаж, хөдөлгөөнийг саадгүй нэвтрүүлж байна. Харин Увс, Баян-Өлгий аймагт гүүр нурсны улмаас хөдөлгөөн нэвтрүүлэх ямар ч боломжгүй байгаа. Увс аймгийн Засаг даргын захирамжийн дагуу Улаангом-Хандгайт чиглэлийн замыг хаасан. Увсаас Улаанбаатар хүрэх зам бол чөлөөтэй байгаа.

Түүнчлэн төлөвлөгөөт зам засварын ажил энэ жил хуваарийн дагуу хийгдэж байна. Энэ оны зам засварын ажил одоогийн байдлаар 60-70 хувийн гүйцэтгэлтэй явагдаж байна. Харин энэ жил хур тунадас ихтэй, багахан газарт их хэмжээний бороо орж байгаа тул зам, гүүрний эвдрэл ихээр гарч байгаа юм.

Баяр наадмын өдрүүд дууссан хэдий ч аялал жуулчлал эрчимтэй үргэлжилж байгаа энэ үед иргэд та бүхнийг үерийн уснаас анхаарал, болгоомжтой зорчихыг анхааруулж байна. Зам дээгүүр үер ус давсан, гүүрэн доогуур үер усны хэмжээ ихэссэн тохиолдолд та үерийн ус татартал аюулгүй газар хүлээх нь чухал болохыг анхааруулмаар байна" гэлээ.

 

---