НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүйтэй цаг үеийн асуудлаар ярилцлаа. Нийслэлийн хэмжээнд 2046 албан хаагч, 56 техник хэрэгсэлтэй бэлэн байдалд ажиллаж байна.

Хурандаа Г.Нэргүй: 

-Өнөөдөр гэхэд 13 дуудлага ирсэн байна. Хашаа нурсан, голд машин унтарсан, подваль усаар дүүрсэн гэсэн дуудлага ирж байна. Шаардлагатай тохиолдолд очиж, ихэвчлэн утсаар зөвлөгөө өгч ажиллаж байна. 

Он гарсаар усны 200 гаруй дуудлага ирсэн. 15 хүн усанд осолдож нас барсан. Зургадугаар сарын 10-наас есдүгээр сарын 10-ныг хүртэл хөдөлгөөнт болон завьт эргүүл ажилладаг. Энэ жилийн хувьд Нийслэлийн хүүхэд, залуучууд, гэр бүлийн хөгжлийн газартай хамтран ажиллаж байна. Яагаад гэвэл он гарсаар усанд осолдсон тохиолдол дотор гурван настай хүүхэд эндсэн нь байна. Хамтран ажилласнаар тодорхой үр дүнгүүд гарч байгаа. 

Аврагч нар цогцсыг гаргаад цагдаагийн байгууллагад хүлээлгэн өгдөг. Цагдаагийн байгууллага ослын шалтгааныг тодорхойлдог. Гэхдээ аврагч нараас асуухад бага насны хүүхдүүд томчуудын хараа хяналтгүй байснаас усанд осолдож байна. Мөн гэнэдэж байна. Тогтоол усанд явж байхад гэнэтхэн цүнхээл рүү унаж байна. 

Нийслэлийн хувьд үерийн эрсдэлтэй бүсэд 800 орчим өрх амьдарч байгаа тоо мэдээлэл байна. Эдгээр өрхүүдэд жил бүр анхааруулдаг. "Орон нутгаас ирээд, буух газаргүйгээс буучихлаа" гэсэн тайлбар өгдөг. Нэг бол айл өрх эрүүл, аюулгүй газар буух ёстой. Үгүй бол тухайн хороо хорины удирдлагууд шинээр газар олгож, эдгээр өрхүүдийг эрсдэлтэй бүсээс нүүлгэх ёстой. 

---