ОХУ-ын Холбооны аюулгүй байдлын албаны ажилчид Хабаровскийн хязгаарын захирагч Сергей Фургалыг 2004-2005 оны хооронд хэд хэдэн хувиараа бизнес эрхлэгчийн цуврал аллагыг үйлдсэн гэмт бүлэглэлийг зохион байгуулсан хэрэгт сэжиглэн, баривчилжээ.

Түүнийг уг гэмт хэргийн бүлгэмийг удирдан, олон тооны аллага, аллага үйлдэх оролдлогыг захиалсан гэж үзэж байгаа аж. Оросын Мөрдөн байцаах хороо өнөөдөр буюу долдугаар сарын 9-ны өглөө хийсэн баривчилгааны бичлэгийг ил болгон, “Фургалыг удахгүй яллах бөгөөд мөрдөн байцаалтын хэсэг түүний эсрэг цагдан хорих таслан сэргийлэх арга хэмжээ авахаар шүүхэд хандах болно” гэлээ.

Гэмт хэргүүд тохиосон 2004-2005 оны үед Фургал модон материалын үйлдвэр, дараа нь хаягдал металлын үйлдвэр эрхэлдэг байжээ. Харин 2005 онд тэрээр ОХУ-ын Либерал ардчилсан намд элсэн, Хабаровскийн нутаг дэвсгэрийн хууль тогтоох ассамблейн гишүүн болсон юм. Хоёр жилийн дараа Фургал тус улсын Төрийн Думд суудал авсан.

Албаныхан Фургалаас гадна дөрвөн өөр сэжигтнийг саатуулаад байна. Бүлгийн гишүүд болох эдгээр этгээдүүд Хабаровск болон ойролцоох Амур мужийн орон нутгийн бизнес эрхлэгчдийн эсрэг цуврал гэмт хэрэгт холбогдсон гэж мөрдөн байцаагчид мэдэгдэв.

Эх сурвалж: Meduza, RT

---