УИХ-ын гишүүн Г.Амартүвшинтэй ярилцлаа

-Дэлхий нийтээр халдварт өвчнөөс улбаалж эдийн засгийн хүнд нөхцөлд орж эхэллээ. Манай улс энэ хямралаас яаж гарах вэ?

-Хөрөнгө оруулалтын орчноо сайжруулах, төсвийн хүнд суртлаа багасгах нь чухал. Жижиг дунд бизнесийн төлөөлөлтэй уулзахад зээлийн хүү өндөр байна, татварын дарамт их байна, хүнд суртал хэцүү байна л гэж ярьдаг. Яг энэ асуудлаар яаралтай арга хэмжээ авч ажиллах юм бол манай хувийн хэвшлийнхэн ажлын байраа хадгалж үлдэнэ. Эдийн засгийн хөгжилдөө хувь нэмрээ оруулаад явна.

-Төсөвт тодотгол хийх шаардлага бий юу?

-Мэдээж хэрэг. Өмнө нь ч би хэлж байсан. Наймдугаар сард чуулган хуралдаж, энэ асуудлыг ярилцана.

-Төсөв тодотгох нөхцөл үүсчихээд байхад наадмын 3 тэрбум гэх мэт үргэлгэн зардал их байна. Ажлын байраа яаж нэмэгдүүлэх вэ?

-Ажлын байр нэмэгдүүлэх гэхээсээ илүүтэй одоо байгаа ажлын байраа хадгалж үлдэх нь нэн чухал. Жижиг дунд бизнесүүдээ дэмжиж байж ажлын байраа хадгалж үлдэнэ шүү дээ. 

-Ирэх 4 жилд эдийн засаг ямархуу байх бол?

-Мөнгөний бодлогоо зөв явуулах, хөрөнгө орулалтын нөхцөл байдлыг сайжруулах, гадаадын хөрөнгө оруулагчдыг илүү их татах хэрэгтэй. Тэгэхгүй бол хүнд. 

-Зээлийн хүүг бууруулах талаар энэ онд багтаж тодорхой шийдвэр гаргаж чадах болов уу?

-Өдрийн зээл гэж нэг аймшигтай зүйл бий. Энэ зээлийг хууль бус болгох шаардлагатай гэж би хувьдаа үзэж байгаа. Банкны салбарын өөрчлөлтийг тийм хурдан хийх боломжгүй л дээ. Гэхдээ хурдан л хийх хэрэгтэй. Монгол банкны тоон мэдээллийг харж байхад эх үүсвэр нь хангалттай байгаа. Шинэ зээл гаргах чиглэлээр банкууд хойшоо сууж байгаа дүр төрх ажиглагдаж байна. 

---